Bu gün Xalq artisti, tanınmış aktrisa Zərnigar Ağakişiyevanın doğum günüdür.
Zərnigar Fəti qızı Ağakişiyeva 1945-ci il noyabrın 6-da Quba rayonunun Rustov kəndində anadan olub. Uşaqlıq illəri çətin keçib - ailə problemləri və tənhalıq onu çox erkən yaşda mübariz olmağa məcbur edib.
Shimal.News xatırladır ki, 5 yaşında ilk dəfə səhnəyə çıxan balaca Zərnigar Səməd Vurğunun “Dahi rəhbərə” şeirini söyləyərək tamaşaçı sevgisini qazanıb. Uşaqlıqdan rəsm və musiqiyə marağı olsa da, həyat onu səhnəyə gətirib.
Aktrisa həyatında bir dəfə böyük sevgi yaşayıb, amma bu sevgi ailə ilə nəticələnməyib. O, müsahibələrində “Həyatımın böyük sevgisini yaşadım, amma o insan sənətimi qəbul etmədi”, – deyə xatırlayıb.
Heç vaxt ailə qurmayan və övlad sahibi olmayan Zərnigar xanım sonralar tək yaşayıb. Maddi sıxıntılar, sənətdəki çətinliklər və sağlamlıq problemləri onu daha da qapalı edib.
“Təhminə”, “Ötən ilin son gecəsi” kimi filmlərdə, teatr səhnəsində yaratdığı obrazlarla tamaşaçıların yaddaşında qalıb. Maraqlıdır ki, “Ötən ilin son gecəsi” filmindəki ana obrazını oynayarkən, o, əslində öz anasının həyatını canlandırıb.
Səhnədən uzaqlaşdığı dövrlər də olub. Xəstəliyi və yaddaş zəifləməsi onun aktyorluq fəaliyyətini dayandırmasına səbəb olub. Teatrdan ayrıldığı gün həmkarları onun üçün vida mərasimi təşkil ediblər.
Zərnigar Ağakişiyeva uzun illər şəkər və ürək xəstəliklərindən əziyyət çəkib. Həyatının son illərində tək yaşayırdı. 2018-ci il fevralın 8-də ürək çatışmazlığından dünyasını dəyişib. Onun cansız bədəni evində yalnız 3 gün sonra tapılıb.
Səhnədə güclü, həyatda isə kövrək olan bu qadın Azərbaycan teatr və kino tarixində unudulmaz iz qoydu.
