Gübrələrin qiymətindəki artım kənd təsərrüfatı istehsalının maya dəyərini yüksəldir. Fermerlərin xərcləri azaltmaq üçün gübrədən daha az istifadə etməsi isə məhsuldarlığa və ərzaq təklifinə mənfi təsir göstərə bilər.
Dünyada davam edən müharibələr və təchizat zəncirində yaranan problemlər qlobal gübrə bazarında qiymət artımına səbəb olub. Xüsusilə Azərbaycanın əsas ticarət tərəfdaşlarının yerləşdiyi regionlarda baş verən qarşıdurmalar bu sahəyə də təsir göstərir.
Nəticədə idxal olunan bəzi gübrələrin qiyməti son dövrdə 25-35 faiz artıb. Bahalaşma fermerlərin istehsal xərclərini də artırır.
Kənd təsərrüfatı üzrə mütəxəssis Vahid Məhərrəmli bildirib ki, gübrələrin bahalaşması fermerlərin onlardan daha az istifadə etməsinə səbəb olur. Bu isə birbaşa məhsuldarlığa təsir göstərir.
Onun sözlərinə görə, əvvəllər Rusiyadan gətirilən azot gübrəsinin bir tonu 31 manata satılırdısa, hazırda qiymət 43 manata yüksəlib. Yerli istehsal olan karbamidin qiymətində də artım qeydə alınıb.
Mütəxəssis hesab edir ki, fermerlər artan xərclərə baxmayaraq, gübrədən istifadədən imtina etməməlidirlər:
"Əslində, indi baha da olsa, gübrəni alıb məhsuldarlığı artırmalıdırlar. Onlar qazanclarını yalnız məhsuldarlığın artırılması hesabına artıra bilərlər".
Vahid Məhərrəmlinin fikrincə, gübrələrin bahalaşması taxılçılıq, tərəvəzçilik və meyvəçilik də daxil olmaqla, kənd təsərrüfatının müxtəlif sahələrinə mənfi təsir göstərə bilər.
Gübrə xərclərinin artması istehsalın maya dəyərini yüksəldə, fermerlərin ondan istifadəsini azaltması isə məhsulun həcmi və keyfiyyəti ilə bağlı risklər yarada bilər. Bu prosesin ərzaq bazarına təsiri isə kənd təsərrüfatı istehsalının növbəti mərhələlərində daha aydın görünə bilər. Mənbə: Baku TV
