Evini sataraq İsmayıllıya köçmək istəyən ata ilə oğlu arasında mübahisə fiziki zorakılıqla nəticələndi.
Hadisə Bakının Zabrat qəsəbəsində baş verib.
Məlumata görə, 38 yaşlı Elman Ağayev (ad və soyad şərtidir – red.) işdən evə qayıtdıqdan sonra atasının yaşadıqları evi satmaq istədiyini öyrənib.
Atası ona evi sataraq İsmayıllı rayonuna köçməyi planlaşdırdığını deyib. Oğul isə bu qərara etiraz edərək evin satışına imkan verməyəcəyini bildirib.
Bundan sonra tərəflər arasında mübahisə yaranıb. Elman atasına yumruq və təpiklərlə zərbələr endirərək ona xəsarət yetirib.
Hadisə ilə bağlı polis əməkdaşları əraziyə gəlib və Elman saxlanılıb. Fakt üzrə cinayət işi başlanaraq məhkəməyə göndərilib.
Sabunçu Rayon Məhkəməsində keçirilən proses zamanı ata və oğul barışıblar. Tərəflərin barışması nəzərə alınaraq cinayət işinə xitam verilib.
Mənbə: Oxu.az
