Elm və Təhsil Nazirliyi Botanika İnstitutunun alimlərinin iştirakı ilə hazırlanmış tədqiqatın nəticələri beynəlxalq jurnalda (Journal of Bryology) işıq üzü görüb. Mamırların yeni taksonlarına aid yazılan geniş məqalədə Azərbaycan florası üçün yeni mamır növü əks olunub.
Beynəlxalq müəllif heyətinin iştirakı ilə hazırlanan məqalə "Mamırların yeni milli və regional qeydləri, 86" adı altında dərc edilib. Məqalənin hazırlanmasında Böyük Britaniya, Kolumbiya, Türkiyə, Hindistan, Polşa, Macarıstan, Portuqaliya və digər ölkələrin elmi qurumlarından olan tədqiqatçılar iştirak ediblər. Nəşrdə dünyanın müxtəlif regionlarında mamır biomüxtəlifliyinin vəziyyəti, bəzi növlərin yayılma areallarının genişlənməsi və onların taksonomik xüsusiyyətləri barədə məlumat verilir. Məqalənin Azərbaycana həsr olunmuş hissəsində ölkə florası üçün yeni olan Tortula hoppeana mamır növünün aşkar edilməsi təqdim olunub.
Karadeniz Texnik Universiteti ilə imzalanmış əməkdaşlıq memorandumu çərçivəsində həyata keçirilən tədqiqat işinin həmmüəllifləri professor Səyyarə İbadullayeva, dosent Aygün Məmmədova, professor Nevzat Batan, dosent Hüseyin Erata və Edanur Ayhandır. Birgə araşdırmalar zamanı Xızı rayonunda yerləşən Altıağac Milli Parkının ərazisində torpaq mühiti üzərində Tortula hoppeana mamır növü aşkar edilib. Toplanmış nümunələrin tədqiqi nəticəsində bu növün Azərbaycan florasında ilk dəfə qeydə alındığı təsdiqlənib. Beynəlxalq nəşrdə bildirilir ki, son tapıntı ilə birlikdə Azərbaycanın zəngin mamır florası hazırda təxminən 507 takson, 153 cins və 58 fəsilə ilə təmsil olunur.
