Beşbarmaq dağı yaxınlığından keçən köçəri quşların sayı bu ərazinin dünya miqyasında əhəmiyyətini ortaya qoyur.
Siyəzən rayonundakı Beşbarmaq dağı təkcə tarixi və dini abidələri ilə deyil, həm də milyonlarla quşun miqrasiya yolu üzərində yerləşməsi ilə unikaldır.
Shimal.News xəbər verir ki, beynəlxalq ornitoloqların araşdırmalarına əsasən, 2018-ci il sentyabrın 1-dən dekabrın 7-dək Beşbarmaq ərazisindən cənuba doğru köç edən 2,3 milyondan çox quşun keçdiyi hesablanıb.
Həmin müşahidələr zamanı 273 quş növü qeydə alınıb.
Bəs quşlar niyə məhz buradan keçir?
Səbəb ərazinin coğrafi mövqeyidir. Beşbarmaq yaxınlığında Böyük Qafqaz dağları Xəzər dənizinə qədər uzanır və arada təxminən 2,5 kilometr enində sahil düzənliyi qalır.
Həm yüksək dağları, həm də dənizi keçməkdən yayınan köçəri quşların böyük hissəsi məhz bu dar təbii dəhlizdən istifadə edir.
Mütəxəssislər hesab edirlər ki, əslində buradan keçən quşların sayı qeydə alınandan da çox ola bilər. Çünki müşahidələr bütün miqrasiya dövrünü və gecə uçuşlarının hamısını əhatə etməyib.
Beləliklə, Siyəzəndəki Beşbarmaq dağı Avrasiya quşlarının miqrasiyasını öyrənmək üçün beynəlxalq əhəmiyyətli ərazilərdən biridir.
