Milli Kibertəhlükəsizlik Agentliyi ölkə ərazisində kütləvi kiberdələduzluq cəhdlərinin müşahidə olunması ilə bağlı vətəndaşlara xəbərdarlıq edib.
Shimal.News xəbər verir ki, son zamanlar kiberdələduzların hədəfinə adi vətəndaşlarla yanaşı, müxtəlif dövlət rəsmilərinin yaxınları da düşür.
Agentliyin məlumatına əsasən, dələduzlar müasir informasiya texnologiyalarından və sosial mühəndislik üsullarından istifadə edərək insanları təşvişə salmağa, aldatmağa və onların maliyyə vəsaitlərini ələ keçirməyə çalışırlar.
Bu məqsədlə telefon nömrələrinin saxtalaşdırılması, psixoloji təzyiq, WhatsApp vasitəsilə zəng və mesajlar, eləcə də süni intellektin köməyi ilə insanların səslərinin təqlid edilməsi kimi üsullardan istifadə olunur.
Dələduzlar insanları necə aldadırlar?
Kiberdələduzlar əsasən telefon və WhatsApp vasitəsilə vətəndaşlarla əlaqə saxlayaraq özlərini dövlət qurumlarının və hüquq-mühafizə orqanlarının əməkdaşları kimi təqdim edirlər. Onlar müxtəlif təhdidlərlə insanları qorxudaraq şəxsi və bank məlumatlarını əldə etməyə çalışırlar.
Digər geniş yayılan üsul isə ailə üzvlərinin aldadılmasıdır. Dələduzlar vətəndaşların valideynlərinə və digər yaxınlarına zəng edərək övladlarının və ya qohumlarının təcili köməyə ehtiyacı olduğunu bildirirlər. Bu zaman psixoloji manipulyasiya, süni intellektlə səs təqlidi və saxta internet keçidlərindən istifadə oluna bilər.
Beləliklə, cinayətkarlar insanların narahatlığından və yaxınlarına kömək etmək istəyindən sui-istifadə edərək onların fərdi məlumatlarını, bank kartı məlumatlarını və maliyyə vəsaitlərini ələ keçirməyə cəhd göstərirlər.
Vətəndaşlara dörd vacib tövsiyə
Milli Kibertəhlükəsizlik Agentliyi əhalini diqqətli olmağa çağıraraq aşağıdakı tövsiyələri verib:
1. Şübhəli zəng və mesajlar zamanı təşvişə düşməyin, tələsik qərarlar qəbul etməyin.
2. Dövlət qurumlarının adından şübhəli zəng və ya mesaj aldıqda əlaqəni dərhal dayandırın. Müraciətin həqiqiliyini həmin qurumun rəsmi əlaqə vasitələri ilə yoxlayın.
3. Bank kartlarının məlumatlarını, ikimərhələli təsdiqləmə (2FA) kodlarını və SMS vasitəsilə göndərilən təsdiq kodlarını heç kimlə paylaşmayın.
4. Xüsusilə yaşlı valideynlərinizi və digər ailə üzvlərinizi kiberdələduzların istifadə etdiyi üsullar barədə məlumatlandırın.
Agentlik vətəndaşları telefon və sosial şəbəkələr vasitəsilə daxil olan şübhəli müraciətlərə qarşı ayıq-sayıq olmağa, şəxsi və maliyyə məlumatlarının təhlükəsizliyini qorumağa çağırır.
