Qubadlı şəhərinin işğaldan azad edildiyi 25 oktyabr tarixi Azərbaycanın Vətən müharibəsində qazandığı tarixi Qələbənin rəmzlərindən biridir.
Shimal.News xəbər verir ki, Müzəffər Azərbaycan Ordusu 2020-ci il oktyabrın 25-də Qubadlı şəhərini işğaldan azad edib. Bununla da şəhərdə Azərbaycanın üçrəngli Dövlət Bayrağı təxminən 27 illik fasilədən sonra yenidən dalğalanıb.
Qubadlı 1993-cü il avqustun 31-də Ermənistan silahlı qüvvələri tərəfindən işğal edilmişdi. Şəhərin azad olunması Vətən müharibəsinin gedişində mühüm hərbi-strateji əhəmiyyət daşıyıb və Azərbaycanın ərazi bütövlüyünün bərpası istiqamətində növbəti böyük uğur olub.
Qubadlı Şəhəri Günü Prezident İlham Əliyevin 31 iyul 2023-cü il tarixli sərəncamı ilə təsis edilib. Hər il oktyabrın 25-də qeyd olunan bu gün şəhərin azadlığını, xalqımızın əzmini və şəhidlərimizin qəhrəmanlığını ehtiramla yad etmək baxımından xüsusi əhəmiyyət daşıyır.
İşğal dövründə Qubadlıda yaşayış evləri, tarixi və mədəni irs nümunələri dağıdılıb, şəhərin infrastrukturu ciddi zərər görüb. Hazırda azad edilmiş ərazilərdə bərpa və yenidənqurma işləri aparılır, doğma yurdlarına qayıdış üçün şərait yaradılır.
Qubadlı Şəhəri Günü Azərbaycanın suverenliyi və ərazi bütövlüyü uğrunda canından keçən şəhidlərin xatirəsini yad etmək, qazilərin fədakarlığını ehtiramla anmaq və işğaldan azad edilmiş torpaqların dirçəlişini vurğulamaq üçün əlamətdar gündür.
