Sürücülər Bakı–Quba–Rusiya sərhədi ödənişli yolunun Xaçmaz ərazisindən keçən hissəsindən şikayətçidirlər. Onlar qaranlıqda hərəkətin çətinləşdiyini və qəza riskinin artdığını bildirirlər.
Shimal.News xəbər verir ki, Xaçmaz və Quba istiqamətlərində hərəkəti təmin edən körpüdə, eləcə də ödənişli yolun Xudat–Qusar yolu ilə kəsişməsində yerləşən körpüdə işıqlandırma sistemi bərbad vəziyyətdədir.
Sürücülərin sözlərinə görə, bu vəziyyət illərdir davam edir. Qubadan Xaçmaz istiqamətində hərəkət edən sürücülər bildirirlər ki, körpünün yarısını keçdikdən sonra işıqlar yanmır - yol qaranlığa qərq olur.
Onların iddiasına görə, işıqlandırma sistemi körpü istifadəyə verildikdən sonra bir müddət normal fəaliyyət göstərsə də, sonradan yaranan nasazlıq indiyədək aradan qaldırılmayıb.
Oxşar vəziyyət Xudat–Qusar yolu ilə kəsişmədəki körpüdə də yaşanır. Gecə saatlarında həmin ərazilərdən keçən sürücülər işıqlandırılmayan hissələrdə avtomobillərinin faralarına güvənməli olurlar.
Bu hal görünüş məsafəsini məhdudlaşdırır, xüsusilə yağıntılı və dumanlı havalarda hərəkəti çətinləşdirərək qəza riskini artırır.
Sürücülər aidiyyəti qurumları problemin aradan qaldırılmasına və işıqlandırma sisteminin tam işlək vəziyyətə gətirilməsinə çağırırlar.
