Azərbaycanda turizm potensialı olan kəndlərin "Turizm kəndi" konsepsiyasına daxil edilməsi üçün yeni seçim meyarları hazırlanıb.
Hazırda Qusarın Laza, Qubanın Qrız, Qəbələnin Duruca, Qaxın İlisu və Sarıbaş, İsmayıllının İvanovka, Lerikin Bibiyani və Astaranın Sım kəndlərini əhatə edən "Turistik kənd" layihəsi mərhələli şəkildə həyata keçirilir.
Yeni konsepsiya Azərbaycan Prezidentinin 20 avqust 2026-cı il tarixli Sərəncamı ilə təsdiqlənən 2026–2030-cu illər üçün Dövlət Proqramı çərçivəsində formalaşdırılacaq.
Dövlət Turizm Agentliyindən bildirilib ki, kəndlərin seçimində yalnız təbii və turizm imkanları deyil, nəqliyyat əlçatanlığı, infrastruktur, yerli icmanın iştirakı, memarlıq və mədəni irs, ekologiya, xidmət imkanları və dayanıqlı inkişaf potensialı da nəzərə alınacaq.
Hazırda layihədə yer alan kəndlərdə turizm infrastrukturunun inkişafı və digər tədbirlərin davam etdirilməsi planlaşdırılır.
Yeni kəndlərin "Turizm kəndi" kimi seçilməsi isə hazırlanacaq vahid meyarlar və normativ hüquqi çərçivə əsasında aparılacaq.
Qeyd edək ki, şimal bölgəsindən Laza və Qrız artıq layihə çərçivəsində yer alan kəndlər sırasındadır.
Mənbə: Modern.az
