Rayonlarda evlərin ucuz və ya baha olması əsasən həmin rayonun iqtisadi vəziyyəti və infrastrukturundan asılıdır. Rayon nə qədər inkişaf edibsə, torpaq və tikinti xərcləri də o qədər yüksək olur. Bu da evlərin qiymətinə təsir edir.
Far.az-ın məlumatına görə, bunu Azərbaycan Qiymətləndiricilər Cəmiyyətinin sədri Vüqar Oruc deyib.
Onun sözlərinə görə, zavod və fabriklərin işlədiyi, insanların daimi iş tapdığı və sosial vəziyyətin stabil olduğu rayonlarda evlər daha baha satılır. Bunun səbəbi həmin yerlərdə alıcının və tələbatın çox olmasıdır.
Qiymətlərə təsir edən digər vacib amil turizmdir. Turistlərin çox gəldiyi rayonlarda evlər təkcə yaşamaq üçün yox, həm də investisiya məqsədilə alınır. Bu da qiymətlərin artmasına səbəb olur.
Məsələn, Qəbələ və Zaqatala bu baxımdan seçilir. Lənkəran rayonu da iqlimi və turizm imkanlarına görə ətraf rayonlarla müqayisədə daha bahadır.
Quba və Qusar rayonlarında turizm sürətlə inkişaf edir və bu da evlərin qiymətlərini artırır. Son illər Şamaxı və İsmayıllıda aparılan yol, turizm və digər infrastruktur layihələri nəticəsində burada da fərdi evlərin qiyməti xeyli yüksəlib.
Ümumilikdə, turizm və iqtisadi fəaliyyətin güclü olduğu rayonlarda evlər daha baha olur. Belə yerlərdə 1 kvadratmetrin orta qiyməti təxminən 700–1000 manat arasında dəyişir.
Əksinə, iqtisadi cəhətdən zəif inkişaf etmiş, iş imkanları və infrastrukturu məhdud olan rayonlarda evlər daha ucuzdur. Bu rayonlarda 1 kvadratmetrin qiyməti orta hesabla 250–400 manat civarındadır.
