İntensiv qulluq sayəsində sürətlə inkişaf edən və yüksək məhsuldarlığı ilə qazanclı sahə hesab olunan şaftalı bağlarının sığortasına başlanılıb.
Shimal.News xəbər verir ki, Quba və Xaçmazda yerləşən təsərrüfatlara 100 min manata yaxın aqrar sığorta ödənişi həyata keçirilib.
Şaftalı bağları bir sıra risklərdən, xüsusilə şaxtavurma, qasırğa, dolu və doludan qaynaqlanan keyfiyyət itkisindən sığortalanır. Fermerlər və bağ sahibləri, Aqrar Sığorta Fonduna vaxtında müraciət edərək temperatur dəyişikliklərinə həssas olan şaftalı bağlarını bu risklərdən sığortalaya bilərlər. Məhsul şərtləri, təklif olunan sığorta zərfləri və təminat verilən risklər haqqında ətraflı məlumatı Fondun rəsmi səhifəsindən əldə etmək mümkündür.
Azərbaycanda ümumilikdə 10 min hektar sahədə şaftalı yetişdirilir və bu sahə sürətlə genişlənir. Aqrar Sığorta Fondunun məlumatına görə, Quba-Xaçmaz iqtisadi rayonu, şaftalı bağlarının sahəsinə görə ölkədə birinci yerdədir. Bu ərazidə şaftalı bağlarının 5,8 min hektarı (yəni 60%-i) yerləşir. Hər il Azərbaycanda şaftalı bağlarından 65 min tondan çox meyvə yığılır və bunun böyük hissəsi ixrac edilir.
Aqrar Sığorta Fondunun məlumatına əsasən, dövlətin dəstəyi ilə tətbiq edilən aqrar sığorta mexanizmi çərçivəsində, şaftalı bağlarını təbiət hadisələri, sel-subasma, dolu, qasırğa-fırtına, normadan artıq qar yağıntıları, yanğın, 3-cü şəxslərin hərəkətləri və digər risklərdən sığortalamaq mümkündür. Həmçinin, əlavə ödənişlə dolu, keyfiyyət itkisi, şaxtavurma, müxtəlif bitki zərərvericiləri və xəstəliklərdən qoruma təmin edilə bilər. Bu zaman sığorta haqqının 50%-i dövlət tərəfindən ödənilir.
