Qax rayonunun Böyük Alatəmir kəndi ərazisində "DoctorBio Qax Eco Park" fəaliyyət göstərir.
Dövlət Turizm Agentliyinin Şəki Regional Turizm İdarəsindən bildirilib ki, bu məkan Qaxın zəngin təbiəti və kənd təsərrüfatı ənənələri əsasında yaradılıb.
"Eco park" ziyarətçilər üçün həm istirahət, həm də təbiətlə tanışlıq baxımından zəngin bir ekosistem təqdim edir. Parkın ərazisində meyvə bağları, maraqlı flora və fauna nümunələri, müxtəlif ölkələrdən gətirilmiş nadir quş növləri var. Həmçinin burada ictimai-iaşə obyektləri, uşaq əyləncə meydançaları, konsert və tamaşalar üçün nəzərdə tutulmuş xüsusi səhnə də quraşdırılıb.
Layihənin reallaşdırılmasında əsas məqsəd kənd həyat tərzini cəlbedici turizm məhsuluna çevirməkdir. Park yerli fermerlərə öz orqanik məhsullarını geniş auditoriyaya tanıtmaq üçün unikal platforma təqdim edir. Bu təşəbbüs Qaxın davamlı turizm destinasiyası kimi mövqeyini gücləndirməklə yanaşı, kənd icmalarının turizm zəncirinə inteqrasiyasını təmin edəcək.
"Eco park"ın fəaliyyəti bölgədə işsizliyin azaldılmasına da mühüm töhfə verəcək. Belə ki, müəssisə tam gücü ilə fəaliyyətə başladıqdan sonra burada 70 nəfərin daimi işlə təmin olunması planlaşdırılır.
