Son illərdə Azərbaycanda qış turizmi sürətlə inkişaf edən və turistlərin maraq göstərdiyi əsas səyahət və istirahət sahələrindən birinə çevrilib. Qış mövsümündə yerli və xarici turist axını mehmanxana infrastrukturuna olan tələbatı əhəmiyyətli dərəcədə artırır.
Trend.az-ın məlumatına görə, turizm eksperti Ceyhun Aşurov bildirib ki, 2025-ci ili təxminən 2 faiz geriləmə ilə baş verib.
Onun sözlərinə görə, turistlər hazırda daha çox qış turizm infrastrukturu olan Quba, Qusar və Qəbələ istiqamətlərinə səfər edirlər.
"Bu bölgələrdəki beşulduzlu hotellərdə bir gecəlik qalmaq haqqı 200–300 manat, fərdi evlərin bir günlüyü 50 manatdan 150 manatadək, villalarda isə qiymətlər 100–500 manat aralığında dəyişir. Təbii ki, həftəsonları və bayram günləri bu qiymətlərə təsir göstərir. Bu bölgələrlə yanaşı, Lənkəran, İsmayıllı, Gəncə və Naftalan istiqamətlərinə də turist axını müşahidə olunur. Həmin bölgələrdə hotellərin və mənzillərin günlük istifadə haqqı nisbətən aşağıdır", – deyə C.Aşurov əlavə edib.
Turizm eksperti Əziz Şiriyev isə bildirib ki, regionlarda qış aylarında istirahət edənlərin bir qismi beşulduzlu hotellərə, digər qismi isə müalicəvi istirahət mərkəzlərinə üstünlük verir. Hazırda Qalaaltı kurortu təmirdə olduğundan turistlər daha çox Lənkəran istiqamətinə üz tuturlar. Hotellərdə qismən durğunluq müşahidə edildiyi üçün müxtəlif endirim kampaniyaları təklif olunur.
Ə.Şiriyev qeyd edib ki, turizm baxımından Qəbələ və Qusar istiqamətləri hazırda xüsusilə populyardır:
"Qusarda Şahdağ Turizm Kompleksi, Qəbələdə isə Tufandağ Turizm Kompleksi xizək mərkəzləri və kanat xətləri ilə turistlərin diqqətini cəlb edir".
Mütəxəssislərin fikrincə, qış turizminə marağın artması regionlarda yerləşmə xidmətləri bazarında rəqabəti gücləndirir və qiymətlərin mövsümə uyğun formalaşmasına səbəb olur. Gözləntilərə görə, qarşıdakı aylarda daxili turizm axınının davam etməsi bu sahədə aktivliyi qoruyub saxlayacaq.
