Azərbaycan Yerüstü Nəqliyyat Agentliyi (AYNA) bir neçə şəhərətrafı və şəhərlərarası avtobus marşrutu üzrə keçirilən müsabiqələrin nəticələrini açıqlayıb.
Shimal.News xəbər verir ki, Bakı–Quba və Bakı–Qusar istiqamətlərində sərnişindaşıma hüququ "ALIOSMAN AĞASOY" MMC-yə verilib. Quba şəhərindəki İkinci Nügədi–Heydər Əliyev prospekti marşrutunun qalibi isə "Uğurlu Yol" MMC olub. Qaliblər arasında Bakı–Zaqatala, Bakı–Xudat və Bakı–Sınıq Körpü istiqamətləri də var.
Bakı–Zaqatala marşrutu üzrə Bəxtiyar Bilalov, Bakı–Xudat istiqaməti üzrə "Logistics And Transport Services" MMC, Bakı–Sınıq Körpü marşrutları üzrə isə Eyvaz Abbasov və Orxan Əmiraslanov qalib elan ediliblər.
AYNA-nın məlumatına görə, marşrutların mərhələli şəkildə müsabiqəyə çıxarılmasında məqsəd sərnişindaşıma xidmətinin keyfiyyətini, təhlükəsizliyini və rahatlığını artırmaq, daşıyıcıların seçilməsində şəffaflığı təmin etməkdir.
