Qax və Şəki rayonlarını əhatə edən 7 saylı Regional Meşə Təsərrüfatı Mərkəzinin iki vəzifəli şəxsi rüşvət almaqda ittiham olunur. Onlardan biri həbs edilib, digəri barəsində ev dustaqlığı seçilib.
Shimal.News xəbər verir ki, Ekologiya və Təbii Sərvətlər Nazirliyindən daxil olmuş məlumat əsasında Baş Prokuror yanında Korrupsiyaya qarşı Mübarizə Baş İdarəsində cinayət işi başlanıb.
İstintaqla müəyyən edilib ki, 2025-2026-cı illərdə mərkəzin direktoru vəzifəsində işlən Fizuli Məmmədov meşəbəyi Vidadi Əsgərovla qabaqcadan əlbir olaraq meşə ərazisindəki torpaq sahələrinin icarəyə verilməsi müqabilində müxtəlif məbləğlərdə rüşvət alıb.
Hər iki şəxsə Cinayət Məcəlləsinin 311.3.1, 311.3.2 və 311.3.3-cü maddələri ilə ittiham elan edilib.
Məhkəmənin qərarı ilə Fizuli Məmmədov barəsində həbs, Vidadi Əsgərov barəsində isə ev dustaqlığı qətimkan tədbiri seçilib. Vidadi Əsgərov əlavə olaraq vəzifəsindən kənarlaşdırılıb.
Hazırda cinayət işi üzrə istintaq davam etdirilir. Digər mümkün iştirakçıların müəyyənləşdirilməsi istiqamətində tədbirlər görülür.
