Qusar rayonunun Yuxarı Zeyxur kəndindən olan Camirzə Ağacanov fəlsəfə doktoru elmi dərəcəsi alıb.
Shimal.News xəbər verir ki, Camirzə Hörmət oğlu Ağacanov 1995-ci ildə Qusar rayonunun Yuxarı Zeyxur kəndində anadan olub. 2012-ci ildə doğulduğu kənddə tam orta təhsilini əla qiymətlərlə başa vurub. Məktəb illərindən elmə və biliyə maraq göstərən gənc respublika fənn olimpiadalarında iştirak edərək bir dəfə birinci, bir dəfə isə üçüncü yerə layiq görülüb.
Ali məktəblərə qəbul imtahanlarında 608 bal toplayan Camirzə Ağacanov Bakı Ali Neft Məktəbinə qəbul olunub. 2014-cü ildə təhsilini Bakı Dövlət Universitetində kompüter elmləri ixtisası üzrə davam etdirib. 2018-ci ildə bakalavr təhsilini başa vurduqdan sonra həmin ixtisas üzrə magistraturaya qəbul olunub. O, "Kompüter sistemləri və şəbəkələrinin proqram təminatı" istiqaməti üzrə ixtisaslaşaraq 2020-ci ildə magistr dərəcəsi alıb.
Elmi fəaliyyətini davam etdirən Camirzə Ağacanov 2021-ci ildə "Sistem analizi, idarəetmə və informasiyanın işlənməsi" ixtisası üzrə fəlsəfə doktoru proqramına qəbul olunub.
Uzunmüddətli elmi tədqiqatların nəticəsi olaraq, 30 may 2025-ci ildə "Kommersiya banklarında risklərin qiymətləndirilməsi və idarə olunması üçün neuro-fuzzy modellərin və instrumental vasitələrin işlənməsi" mövzusunda dissertasiya işini uğurla müdafiə edib.
Gənc alimin əmək fəaliyyəti də müxtəlif sahələri əhatə edir. O, müxtəlif illərdə Bakı Dövlət Universitetində müəllim, Dövlət İmtahan Mərkəzində məsləhətçi, "Metak" şirkətində və "Avrasiya Bank" ASC-də proqramçı vəzifələrində çalışıb. Hazırda "PAŞA Holding"ə daxil olan "PAŞA Həyat Sığorta" ASC-də fəaliyyətini davam etdirir.
30 oktyabr 2026-cı ildə Azərbaycan Respublikasının Prezidenti yanında Ali Attestasiya Komissiyası Camirzə Ağacanova fəlsəfə doktoru elmi dərəcəsinin verilməsi barədə qərarı təsdiqləyib.
