Yeni qanun layihəsinə əsasən, zabit, gizir, miçman və müddətdən artıq xidmət edən hərbçilər üçün inzibati cərimə alternativi nəzərdə tutulur.
Shimal.News xəbər verir ki, bununla bağlı dəyişiklik Milli Məclisin bugünkü iclasında müzakirəyə çıxarılıb və birinci oxunuşda qəbul edilib.
Layihəyə əsasən, hərbi qulluqçunun hərbi hissəni və ya xidmət yerini özbaşına tərk etməsi, yaxud üzrlü səbəb olmadan vaxtında xidmətə gəlməməsi bir gündən artıq, 10 gündən çox olmayan müddətdə baş verdikdə, 200 manatdan 300 manatadək cərimə tətbiq edilə bilər. Alternativ olaraq, 15 günədək inzibati həbs nəzərdə tutulur.
Qüvvədə olan qanunvericiliyə görə, bu əmələ görə 20 günədək inzibati həbs tətbiq edilir.
Eyni əməlin inzibati tənbeh haqqında qərar qüvvəyə mindikdən sonra bir il ərzində təkrar törədilməsinə görə isə 300 manatdan 500 manatadək cərimə və ya 10 gündən bir ayadək inzibati həbs təklif olunur. Hazırda təkrar pozuntuya görə 15 gündən bir ayadək inzibati həbs nəzərdə tutulur.
Qeyd edək ki, dəyişikliklərlə həm məsuliyyət tədbirləri dəqiqləşdirilir, həm də inzibati həbsə alternativ olaraq cərimə tətbiqi imkanı yaradılır. Qanun layihəsi hələlik birinci oxunuşda qəbul edilib.
