Şəki-Zaqatala bölgəsində şabalıd yığımı başa çatıb. Zaqatalalı fermerlər son illər məhsuldarlığın kəskin azaldığını, bəzi təsərrüfatlarda yığımın əvvəlki illərlə müqayisədə dəfələrlə aşağı düşdüyünü bildirirlər.
Fermerlərin sözlərinə görə, şabalıd ağaclarının quruması məhsul itkisinə səbəb olan əsas amillərdəndir. Zaqatalanın Aşağı Çardaxlar kənd sakini Yusif Mustafayev bildirib ki, 10 il əvvəl 300-400 kiloqram məhsul götürdüyü bağdan bu il cəmi 10-15 kiloqram şabalıd yığa bilib.
Məhsulun bazar qiyməti də mövsüm ərzində aşağı düşüb. İlk vaxtlar kiloqramı 13-15 manata satılan şabalıd hazırda keyfiyyətindən və növündən asılı olaraq 6-10 manat arasında təklif olunur. Bəzi fermerlər məhsulu qiymətlərin yüksələcəyinə ümid edərək mart-aprel aylarına qədər saxlayırlar.
Kənd Təsərrüfatı Nazirliyinin məlumatına görə, 2025-ci ildə ölkədə 273,5 hektar şabalıd bağı olub və bu sahələrdən 554,6 ton məhsul əldə edilib. İstehsalın təxminən 92 faizi Şəki-Zaqatala iqtisadi rayonunun payına düşüb. Əsas istehsalçı rayonlar Qəbələ, Zaqatala, Oğuz, Balakən və Qubadır.
2026-cı il üzrə yığım davam etdiyindən ölkə üzrə yekun istehsal və məhsuldarlıq göstəriciləri hələ açıqlanmayıb.
Nazirlikdən bildirilib ki, şabalıd istehsalının artırılması üçün yeni bağların salınması, xəstəliklərə davamlı sortların əkilməsi və mövcud ağacların zərərli orqanizmlərdən qorunması istiqamətində tədbirlər görülür.
Bundan başqa, 2027-ci ildən Qarabağ və Şərqi Zəngəzurda müəyyən şərtlərlə şabalıd bağı salan fermerlərə hektara 3 250 manat birdəfəlik subsidiya veriləcək. Dağlıq və dağətəyi ərazilərdə intensiv və superintensiv şabalıd bağları salan fermerlər isə beş il ərzində hər il hektara 800 manat əkin subsidiyası ala biləcəklər.
Dövlət Statistika Komitəsinin 2026-cı ilin sentyabr ayına olan məlumatına əsasən, ölkədə yerli şabalıdın orta satış qiyməti kiloqramı 9 manat 64 qəpik, idxal məhsulunun qiyməti isə 11 manat 38 qəpik olub.
Mənbə: ATV
