Bir müddət öncə "Zaqatala"nın Premyer Liqaya lisenziya almaq üçün AFFA-ya müraciət etməyəcəyi yerli mediada dərc olunub.
Sport1.az-ın məlumatına görə, klubun prezidenti Şaban Şirdanov məsələyə aydınlıq gətirib:
“Zaqatala"nın maliyyə problemlərinə görə Premyer Liqaya lisenziya almaqdan imtina etməsi doğru deyil. Bu, məntiqsizdir. Çünki iddialı klublar bu problemləri aradan qaldırmaq üçün Premyer Liqaya yüksəlmək istəyirlər. Biz də əsas çempionata vəsiqə qazanmaq üçün mübarizəni sonadək aparacağıq”.
Ş.Şirdanov AFFA tərəfindən klubların infrastrukturlarındakı problemləri aradan qaldırılması üçün verilən möhlət haqqında da fikirlərini səsləndirib:
"İl boyu əziyyət çəkən və birinci-ikinci yerləri tutan komandaların Premyer Liqaya yüksəlməsi ədalətlidir. Həmin kollektivlərə uğurlar arzu edirəm. Stadionlar şərtləri ödəməyəcəksə, həmin klublar başqa arenalarda oynayacaqlar. Növbəti ilədək infrastrukturu düzəldəcəklər. "Zaqatala” elitaya yüksələrsə, qazonu dəyişməyə, hətta Premyer Liqaya yüksəlməsək belə, sponsor tapsaq, bu çempionatda da yenilənmiş ot örtüyü ilə oynamağa başlaya bilərik. Bu səbəbdən də, əminliklə deyə bilərik ki, “Zaqatala" digər komandalardan daha öndədir. Digər komandalara infrastrukturlarını qısa müddət ərzində yeniləyə bilməyəcəkləri üçün onlara bu möhlət verilir. Amma bizdə belə bir problem olmayacaq”.
Klub rəhbəri "Zaqatala"nın I Liqada ilk "3-lük"də yer alması üçün sonadək mübarizə aparacağını da bildirdi:
“Ən böyük hədəfimiz Zaqatalada futbol ənənəsini yaşatmaqdır. Çünki şəhərin sakinlərinin bu idman növünə olan sevgisi böyükdür. Əsas hədəfimiz böyük futbolu Zaqatalada yaşatmaqdır. Təbii ki, Premyer Liqada çıxış etsək, bunları həyata keçirmək daha rahat olar. Biz isə bunu həm rəhbərlik, həm də kollektiv halında etməliyik. “Qəbələ” ilə oyundan sonra komandamız sübut etdi ki, I Liqada bizim qalib gəlməyəcəyimiz rəqib yoxdur. Sonunadək mübarizə aparacağıq. Futbol Zaqatalanın mənəvi dəyərlərindən biridir”.
