Quba rayonunun Zərdabi qəsəbəsində uşaqlar üçün idman meydançasının olmaması yerli sakinlərin narazılığına səbəb olub.
Shimal.News-a müraciət edən kənd sakinlərinin sözlərinə görə, uşaqlar futbol oynamaq üçün heç bir uyğun ərazi tapa bilmirlər.
“Uşaqlar həyətdə, bəzən yol kənarında oynamağa məcbur olurlar. Bu da həm təhlükəlidir, həm də uşaqlar üçün əlverişli şərait deyil. Futbol oynamaq istəyirlər, amma meydança yoxdur. Dəfələrlə müraciət etmişik, amma hələ də nəticə yoxdur,” – deyə sakinlər bildiriblər.
Valideynlər qeyd edirlər ki, idman meydançasının olmaması uşaqların fiziki inkişafına da mənfi təsir göstərir. Onların sözlərinə görə, kəndin əhalisi bu problemi uzun illərdir yaşayır və artıq rəsmi qurumlardan konkret addım atılmasını gözləyir.
Sakinlər ümid edirlər ki, aidiyyəti qurumlar bu problemi diqqətə alacaq və Zərdabi qəsəbəsində uşaqlar üçün futbol meydançasının salınması istiqamətində tədbirlər görüləcək.
