“Şahdağ Qusar”ın 1-ci liqaya yüksəlməsi həm komanda, həm rəhbərlik, həm də Qusar camaatı üçün çox sevindirici haldır. Uzun müddətdir ki, “Şahdağ Qusar” 1-ci liqada yox idi. Hamı bu anı gözləyirdi”.
Bu sözləri Qol.аz-a açıqlamasında 2-ci liqada mübarizə aparan və yeni mövsüm üçün 1-ci liqaya vəsiqəni təmin edən “Şahdağ Qusar”ın kapitanı Rahid Əmirquliyev deyib.
Azərbaycan millisinin sabiq üzvü komandanın daha yüksək hədəflər üçün mübarizə aparacağını qeyd edib:
“Qusarda hamı səbirsizliklə gözləyir ki, komanda yüksək liqada – Premyer Liqada oynasın. Tədricən ona doğru addımlayırıq. İlk hədəf 1-ci liqaya yüksəlmək idi. Şükürlər olsun ki, çempionat bitməmiş istəyimizə çatdıq. Düzdür, əsas məqsəd 1-ci liqaya vəsiqə idi, amma çalışırıq ki, son oyunları da qələbə ilə başa vurub çempionluğu da yaşayaq. Arxayınlaşmaq olmaz. İkinci pillədəki "Şəfa" ilə aramızda cəmi 3 xal fərq var".
36 yaşlı yarımmüdafiəçi 1-ci liqada da “Şahdağ Qusar”ın heyətində oynayacaqmı sualına cavab olaraq, buna qərar verməyin bir çox amildən asılı olduğunu bildirib:
“Əvvəlcə bilməliyik ki, komandanın 1-ci liqadakı hədəfi nə olacaq. Hansı yerlər uğrunda oynayacaq. Bunlar rəhbərliklə görüşəndən sonra bəlli olacaq. Əlbəttə ki, mən davam etmək istəyərdim. Amma onu da nəzərə almaq lazımdır ki, həm yaş gedir, həm 1-ci liqa 2-ci liqadan çətindir. 1-ci liqada mən komandaya fayda verə biləcəm, yoxsa, yox? Yəni qərarıma çox amillər təsir edəcək. Mövsüm başa çatandan sonra ən doğru qərarı verəcəm”.
