Bu gün Birinci Liqa təmsilçisi "Şahdağ Qusar" futbol klubu ilə "ISFA Green Life" şirkəti arasında baş sponsorluq müqaviləsinin imzalanmasına həsr olunmuş rəsmi mərasim keçirilib.
Shimal.News xəbər verir ki, tədbirdə Qusar Rayon İcra Hakimiyyətinin başçısı Sahir Məmmədxanov, FIFA, AFFA və İSFA-nın rəhbər və məsul şəxsləri, "Şahdağ Qusar" futbol klubunun rəsmiləri, rayonun idman ictimaiyyətinin nümayəndələri, sahibkarlar və media təmsilçiləri iştirak ediblər.
Tədbir zamanı "Şahdağ Qusar" Futbol Klubunun keçdiyi inkişaf yolu diqqətə çatdırılıb, rayon futbol azarkeşlərinin komandaya daim sadiq qalaraq yüksək dəstək nümayiş etdirdikləri xüsusi vurğulanıb.
Sahir Məmmədxanov Şövkət Orduxanov adına Qusar şəhər stadionunun Gənclər və İdman Nazirliyinin balansına verildiyini, stadionda əsaslı təmir işlərinə yaxın gələcəkdə başlanmasının planlaşdırıldığını bildirib. O, "Şahdağ Qusar" futbol komandasına gələcək fəaliyyətində uğurlar arzulayıb və İSFA şirkəti ilə qurulan əməkdaşlığın klubun, eləcə də rayonda futbolun inkişafına mühüm töhfə verəcəyinə əminliyini ifadə edib. Eyni zamanda, İSFA şirkətinin dəstəyi ilə rayonda həyata keçirilən sosial və infrastruktur yönümlü layihələr barədə də məlumat verilib.
Sonda "Şahdağ Qusar" Futbol Klubu ilə İSFA şirkəti arasında baş sponsorluq müqaviləsi rəsmi şəkildə imzalanıb.
