Futbol üzrə Azərbaycan Premyer Liqasında çıxış edən "Araz-Naxçıvan" komandasının rəhbərliyi, əslən Qusar rayonundan olan baş məşqçi Elmar Baxşıyev ilə vidalaşıb.
İdman.biz-in məlumatına görə, E.Baxşıyev ayrılığın qarşılıqlı razılaşma əsasında baş vermədiyini bildirib.
Qusarlı mütəxəssisin sözlərinə görə, klub rəhbərliyi onu yanına çağıraraq artıq əməkdaşlıq etmək istəmədiklərini deyib və bununla da proses yekunlaşıb.
Onun müqaviləsi mövsümün sonunadək qüvvədə olsa da, ona heç bir kompensasiya ödənilməyib və bu məsələ ümumiyyətlə müzakirə olunmayıb. Buna baxmayaraq, klub sonradan qarşılıqlı razılaşma ilə yolların ayrıldığını açıqlayıb.
E.Baxşıyev komandanın nəticələrinin "qeyri-qənaətbəxş" kimi təqdim olunmasını da ədalətsiz hesab edir. Onun sözlərinə görə, "Araz-Naxçıvan" qış fasiləsinə uğursuz nəticələrlə yollanmayıb və üçüncü yerlə xal fərqi cəmi iki olub: "Bu göstəricinin uğursuzluq adlandırılması doğru deyil".
Qeyd edək ki, Elmar Baxşıyev 2024-cü ilin aprelində "Araz-Naxçıvan"ın baş məşqçisi təyin edilmişdi. Onun rəhbərliyi altında komanda 2024/2025 mövsümündə Azərbaycan Premyer Liqasında tarixində ilk dəfə üçüncü yeri tutub və UEFA Konfrans Liqasında iştirak hüququ qazanıb.
