Azərbaycan futbolunda fərqli səviyyələr, fərqli tələblər və fərqli reallıqlar mövcuddur. Lakin müasir dövrdə hər bir futbol klubu üçün zəruri olan bir element vardırsa, o da sosial media platformalarında mövcudluqdur. Təəssüf ki, 2-ci liqa təmsilçisi "Qusar" FK bu sahədə ciddi problemlər yaşayır.
Klubun sosial şəbəkə hesabları iki ildən çoxdur ki, tamamilə "donmuş" vəziyyətdədir. Nə oyun xəbərləri, nə transfer məlumatları, nə də sadəcə azarkeşlərlə ünsiyyət var. Maraqlıdır ki, hətta kənd səviyyəsində, həvəskar komandalar belə bu gün sosial media platformalarında aktiv fəaliyyət göstərir, öz azarkeşləri ilə əlaqə saxlayır, nailiyyətlərini və çətinliklərini paylaşırlar.
Azərbaycanda işsizlik problemi haqqında çox danışılır, amma görünür ki, "Qusar" FK üçün bir sosial media meneceri tapmaq çox çətindir. Mobil telefon ilə keyfiyyətli şəkillər çəkib, qısa mətnlər yazıb paylaşmaq mürəkkəb bir iş deyil. Gənc, həvəsli bir insanı cüzi bir məbləğ müqabilində bu işə cəlb etmək mümkün olsa da, klub bunu etməyi lazım bilmir.
Şərhlərdə azarkeşlərin narazılıqlarını görmək mümkündür. İnsanlar öz komandalarının nə etdiyini, kiminlə oynadığını, hansı nəticələr göstərdiyini bilmək istəyirlər.
Futbol klubu nə deməkdir? Bu, sadəcə 11 nəfərin meydançada top qovması deyil, eyni zamanda bir şəhərin, bir rayonun təmsilçisidir. Futbol, bir idman növündən daha çox, icma üçün bir birlik, həmrəylik və qürur mənbəyidir. Ancaq "Qusar" FK bu fürsəti tamamilə əldən buraxır.
Klub öz varlığını nümayiş etdirmək, tanınmaq, azarkeş bazası formalaşdırmaq istəmirmi? Bölgə futbolunun inkişafında maraqlı deyilmi? Bu klub nə üçün yaradılıb? Sadəcə liqa sistemini doldurmaq üçünmü? Yoxsa başqa məqsədlər var?
Bir klub sosial media platformalarından istifadə etmirsə, bu o deməkdir ki, ya onun göstərəcəyi bir şey yoxdur, ya da göstərmək istəmir. Hər iki halda, bu, modern futbol dünyasında ciddi bir qüsurdur.
Davud Maqsudov
