Qusar rayonunu təmsil edən "Zeyxur" komandası Sərhəd hərbi-idman oyunlarının final mərhələsində uğurlu çıxış edərək respublika üzrə ikinci yerə layiq görülüb.
Shimal.News xəbər verir ki, Dövlət Sərhəd Xidmətinin Xüsusi Məktəbində keçirilən təntənəli bağlanış mərasimində DSX, Elm və Təhsil Nazirliyi, eləcə də Gənclər və İdman Nazirliyinin rəsmiləri iştirak edərək qalib komandaları təbrik ediblər.
Tədbirdə bildirilib ki, Ümummilli Lider Heydər Əliyevin anadan olmasının 103-cü ildönümü ərəfəsində keçirilən yarışlar gənclərin vətənpərvərlik ruhunda tərbiyəsi və milli dəyərlərin təbliği baxımından mühüm əhəmiyyət daşıyır. Çıxışlarda vurğulanıb ki, Ulu Öndərin dövlətçilik ideyaları bu gün İlham Əliyevin rəhbərliyi ilə uğurla davam etdirilir.
Qeyd edək ki, respublikanın 36 rayonundan 181 məktəbin 905 şagirdinin qatıldığı yarışların final mərhələsi aprelin 30-dan mayın 5-dək davam edib. Finalda 11 komanda müxtəlif hərbi-idman tapşırıqları üzrə mübarizə aparıb.
Yarışın yekun nəticələrinə əsasən Cəlilabad rayonunun "Musalı" komandası birinci, Qusar rayonunun "Zeyxur" komandası ikinci, Şəmkir rayonunun "Mübarizlər" komandası isə üçüncü yeri tutub.
Sonda qaliblərə kubok, medal, diplom və qiymətli hədiyyələr təqdim olunub. Qusarın "Zeyxur" komandası isə nümayiş etdirdiyi hazırlıq və nəticə ilə rayonun idman və vətənpərvərlik ənənələrini bir daha uğurla təmsil edib.
