Qusar rayonunda yerləşən "Şahdağ" Turizm Mərkəzində keçirilən xizək alpinizmi üzrə Avropa çempionatının ikinci yarış günü başa çatıb.
Shimal.News xəbər verir ki, yarışların ikinci günündə qarışıq estafet növü üzrə mübarizə baş tutub. Yeniyetmə oğlan və qızlar arasında keçirilən yarışda Almaniya komandası birinci yerə layiq görülüb. İspaniya yığması ikinci, Rusiya təmsilçiləri isə üçüncü pillədə qərarlaşıblar.
Böyüklər arasında keçirilən estafet yarışında isə İsveçrə idmançıları Avropa çempionu adını qazanıblar. İtaliya komandası ikinci, Almaniya yığması isə üçüncü yeri tutub.
Qeyd edək ki, Qusarda təşkil olunan Avropa çempionatı çərçivəsində martın 6-da idmançılar fərdi və vertikal növlər üzrə mübarizələrini davam etdirəcəklər. Turnirə müxtəlif ölkələrdən onlarla idmançı qatılıb.
