Azərbaycan Həmkarlar İttifaqları Konfederasiyasının (AHİK) üzv təşkilatı olan Azərbaycan Səhiyyə İşçiləri Həmkarlar İttifaqı Respublika Komitəsinin təşəbbüsü və təşkilatçılığı ilə səhiyyə işçiləri arasında “Sağlamlığa Doğru Qaç” adlı qaçış yarışının növbəti mərhələsi keçiriləcək.
Shimal.News xəbər verir ki, 17 İyun – Tibb İşçilərinin Peşə Bayramına həsr edilən “Sağlamlığa Doğru Qaç!” layihəsi tibb işçilərinin fiziki sağlamlığını təşviq etməyi, asudə vaxtlarını səmərəli keçirməyi, həmkarlar arasında birliyi gücləndirməyi və yeni dostluqlar qurmağı hədəfləyir.
Yarışda Qusar, Siyəzən, Xızı, Şabran, Xaçmaz və Quba rayon Səhiyyə İşçiləri Həmkarlar İttifaqı (SİHİ) şura üzvləri olmaqla 155 nəfərə yaxın iştirakçı qatılacaq.
Tibb müəssisələrində işləyən və təhsil alan hər kəs yarışda iştirak edə bilər (səhiyyə işçiləri və tələbələr).
I, II, III yerlərin qaliblərinə (kişi və qadınlar) mükafatlar təqdim ediləcək.
Qaliblər Xankəndi şəhərində final yarışına qatılmaq imkanı əldə edəcək.
Yarışın başlama vaxtı və yeri:
11 May;
Qusar rayonu;
Saat 09:30.
