2024/25 mövsümündə II Liqanın qalibi "Şahdağ Qusar" oldu.
Bu nəticə ilə bölgə təmsilçisi I Liqaya yüksəldi.
Klubun peşəkar hazırlığı necə gedir? Komanda ev oyunlarını harada keçirəcək? Şövkət Orduxanov adına Qusar şəhər stadionu nə vaxt hazır olacaq?
Sualları klubun prezidenti Elçin Cananov Sport1.аz-a açıqlamasında cavablandırıb:
"Stadionumuzda təmir işləri hələ də yekunlaşmayıb. Betonlama prosesi tamamlanıb. Bununla yanaşı, ot örtüyü həll olunmayıb və santexniki işləri qalıb. Futbol məkanımızın əvvəlki qazonu təbii idi. Yeni stadionda ot örtüyü süni olacaq. Buna səbəb rayonumuzun relyefi və qışın sərt keçməsidir. Çünki sərt hava şəraitində təbii ot örtüyünü qorumaq çətindir. Bu, böyük xərclər tələb edir. Stadionumuzun bu ilin oktyabrına hazır olacağı gözlənilir. Amma bir qədər də uzana bilər. Ən pis halda l Liqanın ikinci dövrəsini doğma məkanımızda keçirəcəyik. Hələlik Şamaxı Olimpiya İdman Kompleksinin stadionunda oynayacağıq".
Klub prezidenti qeyd edib ki, komanda I Liqada yuxarı yerlər üçün mübarizə aparacaq: “Hələlik bəzi işlərimiz var ki, yekunlaşmayıb. Yəni, sponsorumuz ilə görüşümüz olmayıb. Qarşıdakı günlər onlarla görüşəcəyik. Büdcəmiz bilinəndən sonra hədəflərimiz bəlli olacaq. Buna uyğun transferlər edəcəyik. II Liqada mübarizə aparan heyətimizin özəyini qorumaq və əlavə oyunçular cəlb etməyi düşünürük".
