Qubada "Pink Power Fest – qız şagirdlərin idman festivalı" qrant layihəsi çərçivəsində qızlar arasında futzal turniri təşkil olunub.
Shimal.News xəbər verir ki, yarışa Qubanın 4 ümumtəhsil məktəbinin VII–IX siniflərində təhsil alan 32 nəfər qız şagird qatılıb. Turnir Rəhman Məmmədov adına Alekseyevka kənd tam orta məktəbinin idman zalında keçirilib.
Açılış mərasimində bildirilib ki, bu təşəbbüsün əsas məqsədi qızlar arasında sağlam həyat tərzinin təbliği və onların idmana marağının artırılmasıdır.
Rəsmi hissədən sonra yarımfinal oyunlarına start verilib. Nəticələrə əsasən:
Hikmət Hüseynov adına 4 nömrəli humanitar fənlər təmayüllü məktəb-liseyin komandası 7 nömrəli tam orta məktəbin komandasını 6:0 hesabı ilə məğlub edib;
Azad Məmmədov adına 2 nömrəli təbiət fənləri təmayüllü məktəb-liseyin komandası Küpçal kənd tam orta məktəbinin komandasını 11:0 hesabı ilə üstələyib.
Final qarşılaşmasında Azad Məmmədov adına 2 nömrəli məktəb-liseyin komandası Hikmət Hüseynov adına 4 nömrəli məktəb-liseyin komandasına 3:1 hesabı ilə qalib gələrək turnirin qalibi olub.
Üçüncü yer uğrunda oyunda isə 7 nömrəli tam orta məktəbin komandası əsas vaxtı 0:0 başa çatan qarşılaşmada Küpçal kənd məktəbinə penaltilər seriyasında 3:2 hesabı ilə qalib gəlib.
Sonda qalib və mükafatçılar kubok, medal və diplomlarla təltif olunublar. Turnirin ən məhsuldar oyunçusu 11 qolla bombardir olan Gülay Cəfərli seçilib və xüsusi kubokla mükafatlandırılıb.
Qeyd edək ki, "Pink Power Fest" layihəsi Quba rayonunun müxtəlif məktəblərində icra olunur və qız şagirdlərin idmana cəlb edilməsini təşviq etməyi hədəfləyir.
