İkinci liqanın 21-ci turu çərçivəsində keçirilən “Hypers Guba” – “Şəfa” oyununda qonaq komanda ikinci hissəyə başqa rəngdə olan forma ilə meydana çıxıb.
Bunun nə dərəcədə düzgün olub-olmadığını PFL-in Media və marketinq direktoru Sənan Abdullayev football-plus.аz-a danışıb:
“Hansı komanda 2-ci hissədə formasını dəyişmək istəyərsə, oyunçuların forma nömrəsinin eyni qalması, qapıçıların forma rənglərinin qaydalara zidd olmaması şərti ilə hakim buna icazə verə bilər. Bununla bağlı qadağa yoxdur. Hakim mövcud vəziyyəti dəyərləndirərək qərar qəbul edir. “Şəfa”nın oyununda güclü yağış olduğuna görə komandanın forması ilk yarıda hədsiz islanıb. Komandanın 2-ci forma dəstində futbolçu nömrələri eyni olub, həmçinin rəqiblə forma rəngi eynilik təşkil etməyib, tam fərqlənib. Komandalar formanı dəyişməklə bağlı müraciət etsələr belə, yekun qərar hakimə aiddir. O da icazə verib”.
Yeri gəlmişkən, forma dəyişikliyi “Şəfa” üçün düşərli olub. Belə ki, ilk yarıda yalnız bir qol vuran paytaxt klubu 2-ci hissədə daha 4 dəfə fərqlənib.
