İmişli şəhər stadionu Premyer Liqa tələblərinə cavab vermədiyi üçün "İmişli" futbol klubu ev oyunlarını Qubada keçirməyə məcbur qalıb.
Rekord.az-ın məlumatına görə, Quba Olimpiya İdman Kompleksi Premyer Liqa oyunlarını qəbul etsə də, stadionun infrastrukturu ilə bağlı bir sıra ciddi problemlər mövcuddur. Bu problemlər son olaraq "İmişli" – "Araz Naxçıvan" qarşılaşması zamanı açıq şəkildə özünü göstərib.
Stadionda drenaj sisteminin olmaması səbəbindən yağan yağış və qar nəticəsində meydanın ot örtüyü palçığa çevrilib. Bu isə oyunun keyfiyyətinə birbaşa təsir edib. Bundan əlavə, diktor olsa da, vurulan qollar və edilən əvəzləmələr səsləndirilməyib. Səbəb isə səsgücləndirici sistemin işləməməsi olub.
Matçın rəsmi protokolu jurnalistlərə təqdim edilməyib. Oyunsonrası mətbuat konfransının keçirildiyi zalda isə istilik sistemi işləmədiyindən şərait son dərəcə narahatedici olub. Kondisionerin mövcud olmasına baxmayaraq, işləmədiyi, hətta zalın tavanından su damdığı bildirilib.
Digər ciddi problem internet bağlantısı ilə bağlı olub. Oyun ərzində jurnalistlər demək olar ki, xəbərləri operativ şəkildə paylaşa bilməyiblər. Çünki internet mövcud olsa da, faktiki olaraq işləməyib.
Bundan əlavə, stadionda miks zonanın olmaması da jurnalistlərin işini çətinləşdirib. Komandalar üçün ayrılan soyunub-geyinmə otaqlarının stadionun fərqli hissələrində yerləşməsi səbəbindən futbolçular birbaşa avtobuslara yönəlib, bu da media nümayəndələrinin oyunçularla əlaqə qurmasını mümkünsüz edib.
Qeyd olunanlar Quba stadionunda müşahidə edilən əsas nöqsanlardır. Məlumatda bildirilir ki, problemlərin həlli istiqamətində addımların atılması vacibdir və klub rəhbərliyinin jurnalistlərin fəaliyyətinə maneələr yaratmaq əvəzinə, mövcud çatışmazlıqların aradan qaldırılmasına diqqət yetirməsi məqsədəuyğun olardı.
