AFFA İntizam Komitəsi 2-ci liqada mübarizə aparan "Hypers Guba"nın prezidenti Ayaz Abdullayevi, məşqçisi Rəsul Babazadəni, futbolçuları Baxşəli Baxşəliyev və Xaqan Məmmədovu cəzalandırıb.
Shimal.News xəbər verir ki, qərar qurumun bugünkü iclasında qəbul edilib.
Belə ki, “Ağdaş”la oyun bitdikdən sonra Ayaz Abdullayev hakimi təhqir etdiyinə görə, 3 oyun şərti olmaqla 5 oyunluq cəzalandırılıb. Klub isə 400 manat cərimələnib. Sınaq müddəti 3 ay təyin edilib.
Həmçinin görüş başa çatdıqdan sonra məşqçi Rəsul Babazadə meydana daxil olaraq hakimi hədələyib. O, bu səbəbdən 2 oyun cəzalandırılıb. Klub isə 100 manat cərimə edilib.
Bundan əlavə, həmin oyunda klubun futbolçularından Baxşəli Baxşəliyev ciddi qayda pozuntusuna görə birbaşa qırmızı vərəqə aldığı üçün 2 oyunluq, Xaqan Məmmədov isə ikinci sarıdan qırmızı vərəqə aldığı üçün 1 matçlıq cəzalandırılıb.
Qeyd edək ki, "Hypers Guba" - "Ağdaş" görüşü 3:3 hesabı ilə yekunlaşıb.
