II Liqa təmsilçisi “Hypers Guba" tərəfindən verilən apellyasiya şikayəti qismən təmin edilib.
Shimal.News xəbər verir ki, bu barədə AFFA-nın saytı məlumat yayıb.
İntizam Komitəsinin Ruslan Qurbanov barəsində tətbiq etdiyi 4 oyunluq cəzanın çəkilməmiş hissəsi, yəni 2 oyunluq cəzanın şərti olaraq tətbiq edilməsinə qərar verilib. Hücumçuya üç aylıq sınaq müddəti təyin edilib.
Sınaq müddətinin başlanğıcı 2025-ci il martın 6-dan hesablanacaq. Quba təmsilçisinin 300 manat cərimə olunması ilə bağlı qərar isə qüvvədə saxlanılıb.
Qeyd edək ki, Azərbaycan millisinin sabiq forvardı 14-cü turda "Şəmkir"lə matçda hakimi təhqir etdiyi üçün 4 oyunluq cəzalanıb.