Azərbaycan millisinin sabiq futbolçusu Rahid Əmirquliyev “Şahdağ Qusar” klubuna prezident təyin edilib.
Yarımmüdafiəçi Futbolpress.az-a açıqlamasında təyinatıyla bağlı danışıb:
“Klub ötən il çempion olub. Fəaliyyətini dayandırmasını istəməzdim. Ona görə bu addımı atdım. İstəyirəm ki, gələcəkdə Qusarda futbol yaşasın. Düzdür, hələ təhvil-təslim işləri qalıb. Futbolun İnkişafı Fonduna təşəkkür edirəm, çətin vəziyyətdə bizə dəstək oldular. Çətinliklər olsa da, inanıram ki, gələcəkdə hər şey yaxşı olacaq”.
Yeni rəhbər klubun hədəflərinə toxunub:
“Başa düşürük ki, I Liqada oynamaq asan deyil. AFFA-dan verilən pula uyğun komanda formalaşdıracağıq. Gənc heyətimiz olacaq. Ümid var ki, gələcəkdə daha yaxşı olaq. Vəziyyətimiz çox çətindir, amma çalışacağıq ki, bacardığımız qədər yaxşı yerlər üçün oynayaq. İlk hədəfimiz I Liqada möhkəmlənmək olacaq”.
Əmirquliyev klubun rəhbəri olmaqla yanaşı, həm də futbolçu kimi oyunlara çıxacaq. O, belə qərar verməsinin səbəbini izah etdi:
“Bu il də komandada qalıb, kömək etmək fikrim var idi. Baxmayaraq ki, rəhbər təyin olundum… kiməsə qəribə gələ bilər, prezident də oynasın… Amma bunu Qusar futbolu üçün edəcəm. Meydanda və meydandan kənarda əlimdən gələni edəcəyəm”.
