UEFA Regionlar Kubokunun ilkin mərhələsində "Şimal"ın baş məşqçisi komandasının məğlubiyyətindən danışıb. Bu haqda ShimalNews 29 iyun tarixində “Sport24.az”a istinadən məlumat verir.
Komandamız dünən UEFA Regionlar Kubokunun ilkin mərhələsində Gürcüstan təmsilçisi "Football School Bridge" ilə qarşılaşıb və 0:5 hesabı ilə uduzub.
"İlk dəfədir belə turnirə qatılırıq. Qələbə şansımızın az olduğunu, hətta məğlub olacağımızı gözləyirdik. Çox təəssüf ki, böyük hesabla məğlub olduq", - deyə baş məşqçi Tural Cəlilov bildirib.
Daha sonra T.Cəlilov uğursuz matçı belə əsaslandırıb:
"Hypers"lə final matçından sonra heyətin 70 %-ni itirmişik. Oyunçular başqa komandalara keçiblər. Ona görə də məcbur olub kollektivi yenidən yığdım. Bölgəmizdən olan gəncləri ətrafıma toplamışam. Demək olar ki, toplanış, məşq keçmədən turnirə qoşulduq. Təbii ki, təcrübəsiz oyunçularla da beynəlxalq turnirdə böyük hədəflərə nail ola bilməzsən. Gürcüstan komandası bizdən xeyli güclüdür. Onların heyətində vaxtı ilə peşəkar karyerası olmuş oyunçular çoxdur. Deyərdim ki, həvəskar yox, peşəkar komandaya məğlub olduq".
"Şimal" cəmi 1 ildir yaranıb. Komandanın əsas məqsədi ilk olaraq, II liqaya vəsiqə qazanıb çempionatda yerini qorumaq olub. Hazırda yığmanın oyunçularının çoxu özünü dolandırmaq üçün başqa sahələrdə çalışır. Onlara yalnız AFFA-nın ayırdığı pul vəsaiti verilir.
Xaçmaz təmsilçisi növbəti matçını "Qothenburq"a (İsveç) qarşı keçirəcək. Görüş iyulun 1-də baş tutacaq.
