Şahin Şahniyarovun oyunçu kimi keyfiyyətli cəhətlərini gördüm.
Report.аz-ın məlumatına görə, bunu futbol üzrə Azərbaycan millisinin baş məşqçisi Fernandu Santuş mətbuat konfransında I Liqada çıxış edən "Qəbələ"nin üzvü Şahin Şahniyarovun yığmaya çağırılması ilə bağlı danışarkən deyib.
Təcrübəli mütəxəssis bildirib ki, tez-tez aşağı liqanın oyunlarına gedir:
“Bir neçə futbolçu diqqətimizi cəlb edib".
O, özünü yaxşı tərəfdən göstərən futbolçuların milliyə dəvət alacaqlarını vurğulayıb:
"U-17 Liqasını və əvəzedicilərin çempionatını da izləmişəm. Bu, Azərbaycan millisidir. Birdən-birə aşağı liqadan çox futbolçu cəlb edə bilmərik. Təcrübəli futbolçular da gənclərə kömək etməli və yardımçı olmalıdırlar. Yaşından asılı olmayaraq, yığmanın qapıları hər bir azərbaycanlı futbolçunun üzünə açıqdır. Onlar özlərini göstərəndə dəvət alacaqlar".
Qeyd edək ki, Azərbaycan millisi martın 22-də Haiti, martın 25-də Belarusla yoldaşlıq oyunları keçirəcək.
