İkinci liqada yarışan “Hypers Guba” oyunlarını Qubada keçirsə də, məşqləri Bakıya salır.
Bu barədə komandanın baş məşqçisi Elvin Həsənov football-plus.аz-a danışıb:
“Komandamız hazırda ideal formadadır. Məşqlərimiz davam edir. “Hypers Guba” yaranandan bəri ilk dəfə Bakıda məskunlaşıb. Bakıda məşq etməyimizin səbəbi futbolçularımızın çoxunun burada yaşaması ilə bağlıdır. Yalnız bir futbolçumuz Qubadandır. Hədəfimiz 1-ci liqadır. Ora yüksələndən sonra Qubaya köçəcəyik. Qubada olan şərait Premyer Liqanın çox komandasında yoxdur. Azarkeşlərin dəstəyi məni heyrətə gətirir. Autsayder komanda ilə oyunlarda da onlar bizi tək qoymur. 25 ildən sonra Qubaya futbol qayıdıb. Orada hamı futbolu sevir. Onların dəstəyini görəndə hamımız 1-ci liqaya çıxmağı daha çox istəyirik”.
Gənc mütəxəssis 19-cu turda “Ağdaş”la oyunun (3:3) sonlarında baş verən qalmaqalla bağlı da danışdı:
“Oyunun gedişində irəli də çıxdıq, geri də düşdük. Sona bir dəqiqədən az qalmış hakim müəmmalı penalti qərarı verdi. Bu barədə federasiyaya da şikayət etmişik. Futbol qaydalarını hakimlər bizdən yaxşı bilir. Mən də hakimlikdən danışan məşqçi deyiləm. Bu komandanın, azarkeşlərin əziyyətinə heyfdir, haqsızlıq edirlər. Penalti ilə qəti razı deyiləm. Fikrimcə, orada penaltidən söhbət gedə bilməz. Məşqçi olsaq da, futbol qaydalarını da oxuyuruq ki, nə isə olanda bizim də işimiz rahat olsun”.
