Hovuzda fasiləsiz üzmə üzrə Azərbaycan rekorduna imza atan idmançı Cəmil Əliyev qeyri-adi nəticəyə aparan yol barədə açıqlama verib.
İdman.Biz-ə müsahibə verən idmançı bildirib ki, o, həqiqətən də 13 saat dayanmadan üzüb və bu müddətdə əsas faktor fiziki gücdən çox psixoloji hazırlıq olub.
Onun sözlərinə görə, uzunmüddətli üzgüçülükdə insanın özünü idarə etməsi həlledici rol oynayır:
"İnsan ağlının gücü ilə bədənini "yeniləyə" bilər. Əzələlərin yorulması da idarəolunan prosesdir. Hətta davam etməyin mümkünsüz göründüyü anda belə, insan özündə güc tapır", – deyə o qeyd edib.
C. Əliyev rekord cəhdini daha çətin etmək üçün xüsusi üsullardan da istifadə etdiyini bildirib. Onun sözlərinə görə, ilk saatlarda ayaqlarına zəncir bağlayaraq üzüb, sonradan isə bu çətinliyi daha da artırıb.
"Rekordu daha çətin formada qırmaq istəyirdim. Bu, oyundakı kimidir: asan, orta və çətin səviyyə seçə bilərsən", – deyə o vurğulayıb.
İdmançı əlavə edib ki, beynin idarəolunması və fokuslanma onun uğurunun əsas açarıdır. O hesab edir ki, insan düşüncəsini düzgün istiqamətləndirə bilər və bədən bunun ardınca gedir.
Uzun saatlar suyun içində olarkən yaşadığı psixoloji vəziyyətdən danışan C. Əliyev maraqlı məqamlara toxunub:
"Bəzən özümü okeanın ortasında təsəvvür edirdim. Elə anlar olurdu ki, ümumiyyətlə üzdüyümü hiss etmirdim, sadəcə hərəkət edirdim", – deyə o bildirib.
Onun sözlərinə görə, motivasiya təkbaşına kifayət etmir, əsas olan intizam və məqsədə sadiqlikdir:
"İnam, istək və hərəkət birlikdə olmalıdır. İnsan beyni yox, beyin insanı idarə etməlidir".
C. Əliyev həmçinin gələcəkdə Azərbaycan idmanında daha güclü nəslin yetişəcəyinə inandığını qeyd edib.
