"Şamaxı" AFFA İntizam Komitəsinin klubun U-15 komandasının məşqçisi Vüqar Süleymanovla bağlı qərarından apellyasiya şikayəti verəcək.
Report.az-ın məlumatına görə, bunu bölgə təmsilçisinin mətbuat xidmətinin rəhbəri Yusif Hüseynov bildirib:
"Klub olaraq, ümumilikdə həmin oyun zamanı baş verən olaylarla bağlı təəsüflənirik. Amma İntizam Komitəsinin qərarlarında yanlışlıqların olduğunu hesab edirik. Qərardan AFFA-nın Apellyasiya Arbitraj Tribunalına şikayət veriləcək".
Xatırladaq ki, aprelin 22-də keçirilən "Metak"la görüşdə “Şamaxı”nın adı protokolda qeyd edilməyən, lakin qeydiyyatda olan məşqçisi Vüqar Süleymanov meydana çıxaraq rəqibin bir neçə azyaşlı futbolçusunu yumruqla vurduğuna görə AFFA İntizam Məcəlləsinin 1-ci maddəsinin icazə verdiyi müstəsna hal nəzərə alınaraq 1 il müddətinə futbolla bağlı hər hansı fəaliyyətdən məhrum edilib. Həmçinin klub müstəsna hal olaraq 500 manat cərimələnib. Bununla yanaşı, məşqçinin hərəkətinə görə komanda növbəti ev oyununu azarkeşsiz keçirməli olacaq.
