Qusar şəhərinin yeganə futbol stadionu olan Şövkət Orduxanov adına arena 2017-ci ildən bəri təmir adı ilə fəaliyyətini dayandırıb. Lakin illər keçməsinə baxmayaraq, stadionun yenidən istifadəyə verilməsi ilə bağlı konkret irəliləyiş yoxdur.
Shimal.News redaksiyasına müraciət edən şəhər sakinləri və "Şahdağ Qusar" FK-nın azarkeşləri bu vəziyyətdən narazıdırlar.
Qusar futbolunun əsas təmsilçisi olan "Şahdağ Qusar" FK, stadionun bağlı olması səbəbindən ev oyunlarını 5 saatlıq məsafədə – Şamaxıda keçirmək məcburiyyətindədir. Digər yerli klub "Qusar FK" isə Sumqayıtda oynayır. Bu, komandaların azarkeş bazasına, oyun atmosferinə və futbolun yerli səviyyədə inkişafına mənfi təsir göstərir. Şəhər sakinləri komandanın doğma meydanda oynaması üçün uzun müddətdir mübarizə aparırlar.
Məlumatlara görə, stadionun yenidən qurulması üçün FIFA tərəfindən 8 milyon dollar vəsait ayrılıb. Lakin bu vəsaitin hara xərcləndiyi, hansı layihə əsasında işlərin aparıldığı barədə şəffaflıq yoxdur. Stadion tamamilə söküldükdən sonra tikinti işləri başlasa da, yarımçıq qalıb. Rəsmi qurumlar tərəfindən bu məsələyə dair yetərli açıqlamalar verilməyib.
Qusar stadionunun bərpası ilə bağlı müxtəlif tarixlər açıqlanıb. 2023-cü ilin sonuna qədər stadionun istifadəyə veriləcəyi bildirilib, lakin baş tutmayıb. Daha sonra 2024-cü ildə açılacağı vəd edilib, lakin bu da reallaşmayıb. Artıq isə 2025-ci ilin mart ayıdır, lakin stadionla bağlı heç bir yeni xəbər yoxdur.
Stadionun taleyi ilə bağlı qeyri-müəyyənlikdə "Azərenerji" ASC-nin keçmiş prezidenti Etibar Pirverdiyevin adı çəkilir. Bildirilir ki, stadionun ərazisi onun nəzarətinə keçib və burada villa tikmək planı olub. Lakin bu məlumat rəsmi qurumlar tərəfindən nə təsdiq, nə də təkzib edilib.
Qusar sakinləri bu illər ərzində stadionun tamamlanması üçün AFFA, icra hakimiyyəti və digər aidiyyəti qurumlara dəfələrlə müraciət ediblər. Bununla yanaşı, bəzi futbolsevərlər artıq Futbolun İnkişafı Fonduna da müraciət ediblər. Lakin fond məsələnin kluba aid olduğunu bildirərək işin onların üzərinə düşdüyünü deyib.
Stadionun istifadəyə verilməməsi, şəffaf olmayan maliyyə və qeyri-müəyyən planlar şəhər ictimaiyyətini haqlı olaraq narahat edir. İllərdir gözləyən futbolsevərlər ümid edirlər ki, məsələ nəhayət diqqətə alınacaq və stadion doğma şəhərə geri qaytarılacaq.
Qusar stadionu və bu vəziyyətlə bağlı hər hansı rəsmi açıqlama olarsa işıqlandırmağa hazırıq.
