Azərbaycanın ən gənc Milli Parkı hesab edilən Samur-Yalama Milli Parkı Xəzərsahili zonanı, Samur-Şabran ovalığını əhatə edir. Park 5 noyabr 2012-ci ildə Xaçmaz rayonunda yaradılıb. Samur-Yalama Milli Parkının meşələri ölkədə birbaşa Xəzər dənizinə çıxan yeganə yerdir. Park Almaniya Federal Hökumətinin dəstəyi ilə “Qafqaz təşəbbüsü” proqramı çərçivəsində yaradılmışdır, tikintisini isə alman bankı maliyyələşdirmişdir.
Parkın əsas yaranma məqsədi Xəzər dənizinin sahil ekosisteminin mühafizəsi, bir neçə nadir təbii ərazinin bioloji və genetik müxtəlifliyinin qorunması və ekoturizmin inkişaf etdirilməsidir.
Milli Parkın ərazisinin əsasını meşə və düzən landşaft təşkil edir. Parkın ərazisinə daxil olan sahil suları isə balıqla zəngindir. Parkın şimalında, Samur çayının sol sahilində, Rusiyanın eyniadlı Samur dövlət təbiət qoruğu yerləşir.
Milli Parkın florasında itburnu, sarmaşıq, dazı otu, yağı otu, ballı nanə və başqa dərman bitkiləri geniş yayılmışdır. Samur-Yalama Milli parkının ekosistemində əsas ağac növləri uzunsaplaq palıd və İberiya palıdıdır. Rast gəlinən bitki növlərinin arasında düzən ağcaqayını, gürcü palıdı, Şərq fıstığı, göyrüş, qızılağac, uzunyarpaq tozbaş səhləb, Biberşteyn dağlaləsi, əzgil, çiyələk və digərləri var.
Heyvan növlərindən isə çöl donuzuna, yenota, balıq növlərindən çapaq, kütüm, xəşəmə(həşəm) rast gəlinir. Burada “Qırmızı Kitab”a daxil olan qamışlıq pişiyi, vaşaq, Qafqaz maralı, Qafqaz köpkəri, Avropa cüyürü, böyük qırğı, məzar qartalı, adi qızılquş, fısıldayan qulələk, dəniz sıfı, Eldar şamı kimi növlərə rast gəlmək olar. Həmçinin dünyanın ən böyük forel balıqlarından biri - Xəzər foreli Samur-Yalama Milli Parkında qorunur.
[caption id="attachment_33679" align="alignnone" width="640"]
Photo Shimal.News[/caption]
[caption id="attachment_33678" align="alignnone" width="640"]
Photo Shimal.News[/caption]
İstinad edilən mənbələr:
