44 günlük Vətən müharibəsinin üçüncü günü hərbi əməliyyatlar bütün cəbhəboyu davam edib.
Shimal.News xatırladır ki, 2020-ci il sentyabrın 29-u səhər saatlarında Ermənistan silahlı qüvvələri cəbhənin Füzuli-Cəbrayıl istiqamətində yerdəyişmə etmək istəyiblər. Nəticədə Azərbaycan Ordusu tərəfindən düşmənin 1 tankı, 1 avtomobil texnikası və 10 nəfərədək şəxsi heyəti artilleriya zərbəsi ilə məhv edilib.
Düşmən bir daha dinc əhalini atəşə tutub. Baş Prokurorluğun məlumatına görə, həmin vaxt 12 mülki şəxs həlak olub, 35 nəfər isə xəsarət alıb.
Həmin gün Almaniya Kansleri Angela Merkel Azərbaycan Respublikasının Prezidenti İlham Əliyevə telefonla zəng edib. Dövlətimizin başçısı bildirib ki, Ermənistanın hərbi təxribatı ilə bağlı hadisələrin gələcək inkişafına görə məsuliyyət Ermənistanın siyasi və hərbi rəhbərliyinin üzərinə düşür, Azərbaycan Ordusu öz torpaqlarında vuruşur və Ermənistan ordusu Azərbaycan torpaqlarında olmamalıdır.
Azərbaycan Prezidenti İlham Əliyev “Rossiya-1” telekanalının “60 dəqiqə” proqramında Vətən müharibəsi ilə bağlı sualları cavablandırıb.
