Zaqatalada 7 may 2012-ci il tarixdə 2 zəlzələ baş verib.
Shimal.News xatırladır ki, ilk təkanlar saat 9:40-da Zaqatala şəhərinin 17 km cənub qərbində 7 bal gücündə qeydə alınıb.
Birinci zəlzələ nəticəsində rayonun 20 yaşayış məntəqəsində 52 fərdi yaşayış evi uçub, 330 evdə qəzalı vəziyyət yaranıb, 40 sosial obyektdə çatlar əmələ gəlib.
Gün ərzində həmin episentrdə saat 19:15-də təkrar 7 bal gücündə yeraltı təkanın baş verməsi daha ciddi dağıntılara səbəb olub. Ümumiyyətlə 8 may saat 15:00-dək 150-yə yaxın avtoşok olub ki, onların 6-ı daha ciddi hiss olunub.
Zəlzələnin episentrində yerləşən Gözbarax, Mamrux, Zəyəm, Muxax, Bazar, Qımır, Çobankol kənd yaşayış məntəqələrinə daha çox ziyan dəyib.
9 may 2012-ci il tarixdə Azərbaycan Respublikasının Prezidenti cənab İlham Əliyev zəlzələdən zərər çəkən bölgənin sakinləri ilə görüşmək və təbii fəlakətin nəticələrinin aradan qaldırılması ilə bağlı görülən tədbirlərlə yerində tanış olmaq üçün təyyarə ilə Zaqatala rayonuna gəlib.
Dövlət başçısı helikopterlə zəlzələnin episentirindəki ərazini seyr etdikdən sonra zəlzələdən daha çox ziyan çəkən Gözbarax kəndinin əhalisi ilə görüşüb, təbii fəlakətin nəticələrinin qısa zaman ərzində aradan qaldırılacağını, zərər çəkən evlərin, eləcə də ərazidə yerləşən sosial obyektlərin bərpa olunacağını qeyd edərək müvafiq tapşırıqlarını verib. Xoşbəxtlikdən heç bir insan itkisinin olmamasını xüsusi vurğulayıb.
