Xeyriyyəçi Hacı Zeynalabdin Tağıyevin istirahət evi 1900-cu ildə Xaçmaz rayonunun Yeni Həyat qəsəbəsində inşa olunub.
Sakinlərin sözlərinə görə, Tağıyev bu ərazidən keçərək tez-tez Dərbəndə səfər edib. Həmin zaman o, burada istirahət evi tikdirib. Deyilənlərə görə, Tağıyev buraya gələndə yerli əhalini yığıb, onların çətinlikləri ilə maraqlanıb.
Tikili 10 otaqdan ibarətdir. Binanın alt hissəsində dərin bir zirzəmi olub ki, bu da vaxtilə anbar kimi istifadə edilib. Evin özəlliklərindən biri temperatur nə dərəcədə isti olsa da, içərisində hər zaman sərin havanın olmasıdır. Bina sonralar təmir olunsa da, tikilinin ilkin görünüşü dəyişməyib.
Hacı Zeynalabdin Tağıyevin istirahət evi tarixi abidə kimi qeydə alınmayıb. Həmin ev bu günə qədər qorunub saxlanılır və tikili qəsəbə icra nümayəndəliyi və bələdiyyəsinin istifadəsindədir.
Xeyriyyəçi Hacı Zeynalabdin Tağıyev 1823-cü (1838) ildə Bakıda anadan olub. Tağıyevin ölkədə incəsənətin, jurnalistikanın və təhsilin qurulmasında və inkişafında rolu var. O, həmçinin müsəlman Şərqində ilk qızlar məktəbinin yaradıcısı idi. Hacı Zeynalabdin Tağıyev 1 sentyabr 1924-cü ildə vəfat edib.
İstinad edilən mənbələr:
