Ekologiya və Təbii Sərvətlər Nazirliyi (ETSN) şimal bölgəsində bir neçə istiqamətdə yanğınlarla bağlı müraciət edib. Bu barədə ShimalNews 12 iyul tarixində Modern.az-a istinadən məlumat verir.
“Sahibkarlar biçindən sonra əkin sahələrini yandırmasınlar. Yanğın meşəlik əraziləri də təhlükə altına alır. Meşədə istirahətə gedənlər ocaqlara nəzarət etməli, söndürməlidirlər”, - deyə nazirliyin Meşələrin İnkişafı Xidmətinin rəisi Xalıqverdi Hüseynov bildirib.
Həmçinin qurum nümayəndəsi əlavə edib ki, son günlər Şabran Regional Meşə Mərkəzinin Ağalıq kəndi ərazisində və Xaçmaz yolu istiqamətində böyük sahə yanıb.
Yanğın baş verən ərazilərdə közərən, tüstüləyən ağaclar var. Ərazilərdə söndürülmə işləri davam etdirilir. İnsanların biganəliyi ucbatından meşələr fəlakətlə qarşılaşır. Eləcə də bəzən taxıl sahələri biçindən sonra bilərəkdən yandırılır.
Nəticə etibarilə yüzlərlə insanın əzab-əziyyəti 50-100 illik ağacların yanması ilə nəticələnir, təbiətə zərər vurulur.
Sonda bir daha, artıq dərəcədə xahiş edildi ki, odla ehtiyatlı davranılsın ki, meşələr yanğından qorunsun.
