Böyük Britaniyada ictimai siyasət və siyasi məsləhət sahəsində çalışan azərbaycanlı mütəxəssis Pərvinə Hüseynova hazırda qlobal strateji məsləhət şirkətinin rəhbəridir. O, Mühafizəkarlar Partiyasının mərkəzi qərargahında çalışıb, Tereza Meyin və Boris Consonun seçki kampaniyalarında yer alıb, Devid Kemeron kimi siyasi fiqurlarla çiyin-çiyinə fəaliyyət göstərib.
AZƏRTAC-ın məlumatına görə, Pərvinə Hüseynova verdiyi müsahibədə Azərbaycanda başlayan yolunun necə Britaniya siyasətinə qədər uzandığını, rastlaşdığı çətinlikləri, qazandığı uğurları və gələcək planlarını bölüşüb.
-Pərvinə xanım, Azərbaycanda başlayan həyat yolunuz sizi necə Böyük Britaniya siyasətinə qədər gətirdi? Özünüz və bu maraqlı yolçuluq barədə nə danışa bilərsiniz?
-Azərbaycanda böyüyərkən mən o uşaqlardan idim ki, iqtisadiyyat kitablarını əyləncə üçün oxuyur, sertifikatları isə kubok kimi toplayırdım. Məlumat toplamağa aludə olmuşdum, ensiklopediyalar oxuyur, rastıma çıxan hər kursa yazılırdım, çünki bir gün bu biliklərin işə yarayacağına inanırdım.
Bakı Dövlət Universitetində iqtisadiyyat müəllimimlə dəhlizdə gəzərkən gələcək planlarımla bağlı verdiyi sualı hələ də xatırlayıram. Cavabım belə olmuşdu: “Hələ bilmirəm, amma bu, önəmli bir iş olacaq”. Elə bu motivasiya ilə Azərbaycan Dövlət İqtisad Universitetinə keçdim və qiyabi təhsil alaraq bankda işləməyə başladım.
2011-ci ildə Böyük Britaniyaya Beynəlxalq Biznes İqtisadiyyatı ixtisası üzrə magistr təhsili almaq üçün gəldim. Ardınca UCL-də (University College London) siyasət üzrə ikinci magistr təhsilimi aldım və elə orada siyasətə olan həqiqi marağımı kəşf etdim. Parlamentə iş üçün etdiyim saysız-hesabsız müraciətlər təcrübə çatışmazlığı səbəbilə rədd edilsə də, mən təmənnasız olaraq yerli Mühafizəkarlar Partiyası şöbəsində könüllü fəaliyyətə başladım. 2017-ci ildə Tereza Mey gözlənilmədən seçki elan etdikdə, bu əzmkarlığım nəticə verdi və mən Mühafizəkarlar Partiyasının mərkəzi qərargahında çalışmağa başladım. Bəzən uğur, sadəcə, hazır olanlara qismət olur!
– Böyük Britaniyada Mühafizəkarlar Partiyasında yüksəlişiniz necə başladı?
-Atam mənə öyrətmişdi ki, zəhmət hər zaman bəhrəsini verir, mən də bu məğlubedilməz düşüncə tərzini özümdə formalaşdırdım. 2017-ci ildə Tereza Meyin seçki kampaniyası zamanı hansı iş olursa olsun, qəbul edirdim. Seçicilərə zəng vurmaqdan tutmuş telefon mərkəzlərini idarə etməyə qədər. Hətta bu işləri Devid Kemeron, Ceremi Hant kimi siyasi fiqurlarla çiyin-çiyinə görürdüm və nəticədə parlament namizədləri üçün kampaniya meneceri oldum.
Seçkidən sonra Mühafizəkarlar Partiyası məni namizədlərin seçilməsi departamentində köməkçi vəzifəsinə işə götürdü. Orada strateji baxışım və istedadları müəyyən etmə bacarığım məni departamentin rəhbər müavini vəzifəsinə yüksəltdi. Bu müddətdə gələcəyin deputatlarını və meri formalaşdıran komandada oldum. Seçdiyim bəzi deputatlar sonuncu Mühafizəkar hökumətində nazir və kabinet üzvü oldular. Bu şəxslərin siyasi yolunun başlanğıcında olmaq çox qürurvericidir.
– Gələcəkdə birbaşa siyasətə qoşulmaq istəyirsinizmi? Böyük Britaniyada və ya Azərbaycanda parlamentə namizəd olmağı düşünürsünüzmü?
-Bəli, bir gün deputatlığa namizədliyimi vermək istərdim. Amma bunun qazanılmalı bir status olduğuna inanıram. Mən siyasətdən kənarda təcrübəyə xüsusi önəm verirəm və namizədlərdən də bu bacarıqları gözləyirdim. Ona görə də hələlik müxtəlif sahələrdə bilik və bacarığımı artırmağa fokuslanmışam.
ABŞ-da keçirilən seçkiləri müşahidə etmək üçün Kaliforniyaya dəvət olunmuşdum. Orada süni intellektin seçicilərlə ünsiyyətdə tətbiqlərini öyrəndim və balanslı dairələrin necə böyük rol oynadığını araşdırdım.
Azərbaycana gəldikdə isə Prezident İlham Əliyevin liderliyi altında ölkənin keçdiyi inkişaf yolu məni qürurlandırır. Onun “Azərbaycan öz yolunu müstəqillik və ləyaqət prinsipləri ilə müəyyən edəcək” fikri qlobal siyasətdə müdrik mövqeyin göstəricisidir. Gələcəkdə beynəlxalq təcrübəmlə ölkəmə töhfə vermək mənim üçün ən böyük şərəf olar.
- Hazırda Böyük Britaniyada siyasi ab-havanı necə qiymətləndirirsiniz?
- Böyük Britaniya bu yaxınlarda misli görünməmiş siyasi dəyişikliklər yaşadı. Qısa zaman ərzində bir neçə Baş nazir iqtisadi çətinliklər və seçicilərin artan narazılığı ilə üz-üzə qaldıq. Cəmiyyət artıq parıltıdan çox dürüstlük, boş vədlər əvəzinə cavabdehlik istəyir.
Ən böyük çağırış ictimai institutlara olan etimadı bərpa etməkdir. 2024-cü ildə seçilmiş Leyboristlər hökuməti iqtisadi və ekoloji vədlərini yerinə yetirməkdə çətinlik çəkir. Cəmiyyətin parçalanmış maraqları fonunda cəsarətli islahatlarla sosial sabitlik arasında tarazlığı qorumaq əsas məsələdir.
- Böyük Britaniya siyasətində azərbaycanlı qadın kimi hansı çətinliklərlə və uğurlarla qarşılaşdınız?
- Bir çoxları mənə deyirdi ki, xarici qadın olaraq burada müəyyən həddə qədər irəliləyə bilərəm. Bu sözlər məndə “doğru hirs” yaratdı. Mən hər zaman sübut etmək istəyi ilə motivasiya olunmuşam.
Mühafizəkarlar Partiyasındakı son günlərimdə mən yeni siyasətçilərin seçilməsində əsas rol oynayır, ümumi seçkilərdə və mer kampaniyalarında çalışır, beyin mərkəzləri ilə parlament arasında strateji əlaqələr qururdum. İctimai-siyasi konsaltinq şirkətimi təsis etdim, ABŞ-ın aparıcı beyin mərkəzləri ilə əməkdaşlığa başladım və Brüsseldə keçirilən böyük demokratik forumlarda çıxış etdim.
Mənim üçün deyilən bütün “sərhədlər” artıq arxada qaldı.
- Sizcə, Qafqazdan olan şəxslər üçün Böyük Britaniyada ictimai həyata qoşulmaq yolunda daha çox imkan yaranırmı?
-Əlbəttə. Bu, mənim əsas arzularımdan biridir. Britaniyada daha çox uğurlu azərbaycanlını ictimai həyata və siyasətə qoşulmuş şəkildə görmək istəyirəm. Biz Şərqi və Qərbi bir arada anlaya bilən, keçid dövrlərini yaşamış, problemlərə yeni yanaşma gətirən nəsilik.
İndi belə səslərə tələbat həqiqətən var. Britaniya cəmiyyəti bugünkü müxtəlifliyi əks etdirən autentik səsləri axtarır. Artıq iş dünyasında, elmdə, incəsənətdə parlayan azərbaycanlılar var. İndi növbə dövlət xidmətindədir.
Düşünürəm ki, Azərbaycandakı hər bir insan başqa ölkədə uğur qazanmış həmvətəninə görə qürur duyar. Biz ikinci vətənimiz olan ölkələrin inkişafına töhfə verməkdən çəkinməməliyik.
- Sürətli Britaniya siyasi mühitində azərbaycanlı kimliyinizə necə bağlı qalırsınız?
- Ailəm və atamın Qubadakı kəndində keçirdiyim yay xatirələri məni torpağıma bağlayır. Londonda 15 ildir yaşasam da, hələ də hər yay ora gedirəm. Bu, mənə təvazökarlıq və güc verir.
Eyni zamanda, səfirliyimizin London icmasını birləşdirən əla təşəbbüsləri var. Hamımızın ortaq məqsədi mədəniyyətimizi və dəyərlərimizi tanıtmaqdır.
Yaxınlarda COP29-un Azərbaycanda keçirilməsi ilə bağlı Kral Birləşmiş Xidmətlər İnstitutunun və Beynəlxalq Münasibətlərin Təhlili Mərkəzinin təşkil etdiyi dəyirmi masada iştirak etdim. Orada neft ixrac edən ölkələrin bu kimi tədbirlərə ev sahibliyinin nə qədər vacib olduğunu vurğuladım.
Prezident İlham Əliyevin rəhbərliyi ilə Azərbaycan iqtisadiyyatının şaxələnməsi və beynəlxalq tərəfdaşlıqları genişləndirməsi mənə hər gün xatırladır ki, ölkəmiz necə bir uğur yolundadır və mən hara töhfə vermək istədiyimi bilirəm.
- Xaricdə ictimai xidmət və beynəlxalq siyasətlə maraqlanan azərbaycanlı gənclərə nə tövsiyə edərdiniz?
- Başqa bir ölkənin siyasi sisteminə daxil olmaq çətin ola bilər, amma mümkündür. Mənim beş məsləhətim belədir:
Birincisi, seçki dövründə könüllü işlə başlayın. Bu fürsət qapısıdır. İkincisi, şəbəkə qurun, işlərin əksəriyyəti tanışlıqlarla əldə olunur. Üçüncüsü, çevik olun, parlament sizi qəbul etməzsə, beyin mərkəzlərinə və ya hökumət qurumlarına yönəlin. Dördüncüsü, etdiyiniz hər işi səmimi və ehtirasla edin, hətta ən kiçik tapşırıqları belə. Nəhayət, geriləmə olarsa, ruhdan düşməyin, əzmlə irəliləyin.
- İştirak etdiyiniz seçki kampaniyalarından ən yaddaqalan və ya gərgin an hansıdır?
- Boris Consonun gözlənilmədən elan etdiyi seçki kampaniyası tam anlamı ilə enerjili və gərgin bir proses idi. Belə seçkilər o deməkdir ki, adətən dörd ilə görülən işi cəmi dörd həftəyə yekunlaşdırmalısan. Təzyiq inanılmaz dərəcədə yüksək idi.
Qərargahda gecə saatlarınadək işləmək, saysız-hesabsız telefon zənglərini idarə etmək, sürətli namizəd seçimləri və təlim sessiyaları keçirmək, X sosial şəbəkəsində “müharibə otaqlarını” idarə etmək - bu, siyasi teatrın ən intensiv səviyyəsi idi. Hər qərar önəmliydi, hər saat sayılırdı.
- İndiyə qədərki karyeranızda sizi ən çox qürurlandıran nədir və növbəti addımınız nə olacaq?
- Ən çox qürur duyduğum şey heç vaxt mümkünsüz görünən şeylərdən imtina etməməyimdir. Könüllü olaraq başladığım yoldan namizəd seçimi departamentinin rəhbər müavini olmağa, sonra öz beynəlxalq konsaltinq şirkətimi yaratmağa qədər hər mərhələdə gözləntiləri aşmışam.
Hazırda ictimai siyasət üzrə konsaltinq fəaliyyətim mənə bir çox sahədə dəyərli bacarıqlar qazandırır. Artıq təkcə siyasi dairələrdə yox, həm də beynəlxalq forumlarda, korporativ görüşlərdə iştirak edirəm.
Amma atam həmişə mənə belə sual verir: “Ölkəmiz üçün nə etmisən?” Mən bu suala “ölkəmin beynəlxalq yüksəlişinə töhfə verdim” cavabını verə bildiyim gün mənim üçün ən böyük uğur o olacaq. Ən yaxşı fəsillər hələ yazılmayıb.
