Kənan Zaman oğlu Qayıbov 20 noyabr 1936-cı ildə Quba rayonunun Alpan kəndində bəy nəslindən olan Zaman Qayıbovun ailəsində anadan olub.
O, 1944-1954-cü illərdə Alpan kənd orta məktəbində təhsil alıb. 1954-cu ildə indiki Azərbaycan Dövlət Neft və Sənaye Universitetinə geoloji-kəşfiyyat fakültəsinə qəbul olunub.
Qayıbov 1959-cu ildə institutu bitirib, sonra “Neft Daşları Neft və Qaz Çıxarma İdarəsi”nə (keçmiş “Gürganneft Neft Mədənləri İdarəsi”) təyinat alıb və o, burada ilk əmək fəaliyyətinə başlayıb. Qayıbov həmin yerdə 1977-ci ilədək müxtəlif vəzifələrdə çalışıb.
Qayıbov 1971-1973-cü illərdə Kuba Respublikasında xidməti ezamiyyətdə olub və orada “Neft və qaz yataqlarının işlənməsi” üzrə məsləhətçi kimi işləyib. Alimin oradakı əmək fəaliyyəti mütəxəssislər tərəfindən yüksək qiymətləndirilib.
Kuba xatirələrini bölüşərkən o, belə demişdir: “Mən Kubaya ailəmlə getmişdim. Elə üçüncü övladım Əqidə orada dünyaya göz açıb. … Mən Kubada keçirdiyim xidməti ezamiyyətdən sonra təlimata uyğun olaraq, Moskvaya qayıtdım. Oradan da yeni aldığım QAZ-24 maşını ilə düz Alpana qədər gəldim. Səhv etmirəmsə, bu avtomobil kəndimizdə görünən ilk QAZ-24 olub”.
Kənan Qayıbov 1978-2009-cu illərdə Neftqazelmitədqiqatlayihə İnstitutunda çalışmışdır. O, ayrı-ayrı neft və qaz yataqlarının geologiyası, işlənməsi və ehtiyatlarının hesablanması məsələlərinə həsr olunmuş 50-yə yaxın elmi iş və məqalənin müəllifidir.
İstinad edilən mənbələr:
