Quba rayonu ərazisində mövcüd 15 türbədən 4-ü Ağbil kəndində yerləşir. Bu barədə ShimalNews 27 mart tarixində Real TV-yə istinadən xəbər verir.
Sovet dövründə həmin türbələrdən 2-si tamamilə dağılıb. Yerli sakinlərin səyi nəticəsində isə digər 2-si bu günə qədər qorunub saxlanılır. Onlar Şeyx Məzyəd və Şeyx Rəşid türbələridir.
Tarixçi Rəsul Paşayevin sözlərinə görə, Şeyx Məzyəd türbəsi 1537-ci ildə Şirvanşah Xəlilullahın göstərişi ilə memar Tacəddin tərəfindən inşa olunub. O, çöldən 4 və 8 guşəli formadadır.
Bir qədər aralıda isə Şeyx Rəşid türbəsi yerləşir. Abidə xaricdən 8 guşəli, daxildən isə 4 bucaqlıdır. Qədim tikili şərq memarlıq üslubunda inşa edilib. Daxildə Şeyx Rəşidin məzarı da var.
“Tarixi mənbələrə görə, həmin məzarda yatan şəxslər sufi təriqətini Azərbaycanda yaymaq üçün 16-cı əsrdə Ağbil kəndinə gəlib məskunlaşıb, böyük nüfuz və hörmət qazanmışlar. Onlar vəfat etdikdən sonra Şirvanşah Xəlilullahın göstərişi ilə qəbirüstü türbələri yaradılmışdır”, - Rəsul Paşayev bildirib.
[video width="1080" height="1080" mp4="https://shimal.news/storage/photos/2023/03/Sequence-022.mp4"][/video]
