Səkinə Axundzadə 1865-ci ildə Quba şəhərində anadan olub. O, Azərbaycanın ilk qadın rejissoru, ilk qadın dramaturqu və ana dilində ilk orta məktəb dərsliklərinin müəllifidir.
XIX əsrdə qadınların dünyəvi biliklərə yiyələnməsi, müasir düşüncə tərzinə sahib olması cəmiyyət tərəfindən qəbuledilməz idi. Səkinə xanım isə buna baxmayaraq, qızların maariflənməsi ilə məşğul olub.
Səkinə xanım gənc yaşında Qubada Talıb adlı şəxslə ailə həyatı qurur. Daha sonra bu izdivacdan Höküməxanım adlı qızı dünyaya gəlir. Lakin Talıb bəy Qubada qaçaq Alı tərəfindən qətlə yetirilir. Buna səbəb isə Talıb bəyin həyat yoldaşına olan sevgisi və qadınların maariflənməsində ona dəstək olması idi.
O dövrün cəmiyyətində dul qadın olmaq çətin idi. Buna görə Səkinə xanım birinci həyat yoldaşının qətlindən sonra ikinci dəfə ailə qurmalı olur. Onun həyat yoldaşı Qubada rus dili müəllimi işləyən Məhəmməd Ağabəyov idi. Məhəmməd bəy Səkinə xanımın bütün işlərində ona dəstək olurdu.
Onların Yusif adlı oğlu dünyaya gəlir. Bir müddət sonra əri Məhəmməd bəy vəfat edir. Bütün çətinliklərdən keçən Səkinə xanım Axundzadə öz maddi vəsaiti hesabına Qubada, yaşadığı evində məktəb açır, qız uşaqlarına pulsuz təhsil verir.
Səkinə xanım uzun illər ağır astma xəstəliyindən əziyyət çəkib. Bu səbəbdən o, son illərini Qubada, oğlu Yusifin yanında keçirib. Səkinə Axundzadə 1927-ci ildə Bakıda vəfat edib və şəhərin Bibiheybət qəbiristanlığında dəfn olunub.
Səkinə xanımın oğlu Yusif Ağabəyov Qubada “Türk yurdu” cəmiyyətinin yaradılmasında və milli istiqlal hərəkatında iştirak edib. Ağabəyovun açıq fikirliliyi o vaxtkı hakimiyyəti narahat edirdi. O, 1937-ci ildə sürgün olunub, bir müddət sonra isə güllələnib.
İstinad edilən mənbələr:
