Reyhan Topçubaşova 15 dekabr 1905-ci ildə Qubada anadan olub. O, Azərbaycanın ilk qadın rəssamlarından biri, həmçinin cərrah, ictimai və dövlət xadimi Mustafa bəy Topçubaşovun həyat yoldaşı olub.
Shimal.News məlumat verir ki, Reyhan xanım ilk təhsilini Hacı Zeynalabdin Tağıyevin Bakı Qızlar Məktəbində alıb. Rəssam 1923-cü ilə kimi pedaqoji sahədə çalışmaqla yanaşı, konservatoriyanın (indiki Bakı Musiqi Akademiyası) fortepiano sinfində oxuyub. Lakin onun oğlu İbrahim dünyaya gəldiyinə görə, gənc ana təhsilini tamamlaya bilməyib.
Reyhan xanım 1933-cü ildə xüsusi istedadına görə indiki Əzim Əzimzadə adına Azərbaycan Dövlət Rəssamlıq Məktəbinin birbaşa 3-cü kursuna daxil olub. O, burada 1935-ci ilə qədər təhsil alıb. Elə həmin dövrdən də rəssamlıq sənətinə başlayıb. Bir il sonra isə Azərbaycan rəssamlarının sərgilərinə qatılıb.
İlk sərgilənən “Toy” adlı çoxfiqurlu əsəri hazırda Azərbaycan Milli İncəsənət Muzeyində mühafizə olunur. Onun “Köhnə Bakı küçəsi”, “Köhnə bazar”, “İlk təbliğatçı Mina xanım”, “İki sahil”, “Qoca zalım şahın hüzurunda”, “Qız qalası”, “Dəniz”, “Mərdəkanın görünüşü” adlı süjetli tabloları və “Balerina Qəmər Almaszadənin portreti”, “M.Ə.Sabirin portreti”, “Avtoportret” və “Nizami Gəncəvi” kimi portretləri var. Sənət əsərləri müxtəlif Bakı muzeylərinin kolleksiyasında saxlanılır.
Reyhan Topçubaşova 5 mart 1970-ci ildə Bakıda vəfat edib.
